ސައިކަލެއްގެ މަޑިދަށުން ހަތަރު ލައްކައަށް ވުރެ ގިނަ ރުފިޔާ ވަގަށް ނެގި ކަމަށް ތުހުމަތު ކުރެވޭ ބިދޭސީ މީހާ ދެ މަސް ވަންދެން ބަންދުގައި ބެހެއްޓުމަށްފަހު އެންމެ ފަހުން ދޫކޮށްލައިފި އެވެ.
މާލޭގައި ސައިކަލެއްގެ މަޑިދަށުން ވަގަށް ނެގި ކަމަށް ވަނީ 442،750 ރުފިޔާ އެވެ.
މި މައްސަލައިގައި ހައްޔަރުކޮށްފައި ހުރީ ޖަހަންގިރް އާލަމް ކިޔާ ބަންގްލަދޭޝް މީހެކެވެ. އަށް ފަހަރަށް ބަންދުގެ މުއްދަތު ޖަހައި އޭނާ 60 ދުވަހު ބަންދުގައި ބެހެއްޓި އެވެ.
ޝަރީއަތުގައި ޖަހަންގިރް ބުނީ އޭނާ ފްރޭމްކޮށްފައިވާ ކަމަށެވެ. އޭނާ އެންމެ ފަހުން މިއަދު ދޫކޮށްލީ ޝަރުތުތަކަކާ އެކު އެވެ.
ޖަހަންގިރްގެ ބަންދުގެ މުއްދަތު މަޖިލީހުގައި ފުލުހުން ވަނީ އޭނާ އެ ކުށްކުރި ކަމަށް ތުހުމަތު ކުރެވޭ ސީސީޓީވީ ވީޑިއޯ ހުށަހަޅާފަ އެވެ.
މީގެއިތުރުން ފައިސާގެ ވެރިފަރާތުގެ ބަޔާންވެސް ވަނީ ހުށަހަޅާފަ އެވެ. ވީޑިއޯ އިން އޭނާ ސައިކަލެއްގެ މަޑިދަށް ހިއްލައިގެން އެއްޗެއް ނަގާތަން ފެންނަ ކަމަށް ބުނެފައިވެ އެވެ.
ވީޑިއޯއިން ފެންނަ މަންޒަރުތަކަށް ޖަވާބު ދެމުން ޖަހަންގިރްގެ ވަކީލު ކޯޓުގައި ވިދާޅުވީ އެ ސައިކަލުގެ މަޑިދަށުން ނެގީ ވިއްސާރަ ކޯޓެއް ކަމަށެވެ. އަދި ޖަހަންގިރްގެ ދެވަނަ އަނބިމީހާގެ ގެއަށް ވައްދާތައް ފެންނަ ކޮތަޅަކީ ދޮންކޭލާއި ކަދުރު ހުރި ކޮތަޅެއް ކަމަށެވެ. އަދި އެއީ އޭނާގެ އާއިލާއިން ހިއްސާކުރި މައުލޫމާތު ކަމަށްވެސް ވަކީލު ވިދާޅުވި އެވެ.
ކޯޓު އަމުރުގައިވަނީ އެ މައްސަލާގައި ހުށަހަޅާފައިވާ ވީޑިއޯއިން ވިއްސާރަ ކޯޓެއްގެ އިތުރުން އެހެން އެއްޗެހި ނަގާ ތަން ފެންނަ ކަމަށާއި އޭނާ އެ އެއްޗެހި ނެގުމުގައި އަމަލުތައް ހުރި ގޮތުން އިތުރު އެއްޗެއް އޮތްކަން އެނގޭ ކަމަށެވެ.