ވަގު 100 ޑޮލަރުގެ ނޫޓެއް ފިހާރައަކުން މާރުކުރި މީހަކަށް، ގާތްގަނޑަކަށް 1400 ޑޮލަރާ އެއްވަރުގެ ޖޫރިމަނާއެއް ދައްކަން ޖެހިއްޖެ އެވެ.
ހދ. ކުޅުދުއްފުށީ ފިހާރައަކުން ވަގު 100 ޑޮލަރު މާރުކުރުމުގެ މި މައްސަލައަކީ މިދިޔަ އަހަރުގެ ފަހުކޮޅު ހިނގި ކަމެކެވެ.
މި މައްސަލައިގައި ކުޅުދުއްފުށީ މީހަކާ ދެކޮޅަށް ދައުލަތުން ވަނީ މަކަރާއި ހީލަތް ހެދުމުގެ ކުށުގެ ދައުވާ އުފުލާފަ އެވެ.
މި މައްސަލައިގެ ޝަރީއަތުގައި، ވަގު ޑޮލަރު މާރުކުރި މީހާނވަނީ އެ މީހާގެ މައްޗަށް ކުރެވުނު ދައުވާއަށް އިއުތިރާފުވެފަ އެވެ.
ކުށަށް އިއުތިރާފުވުމުން މި މައްސަލަ ކޯޓުގައި ކުރިއަށް ގެންދިޔައީ އަވަސް ނިޔާގެ މައްސަލައެއްގެ ގޮތުގައެވެ.
މި މައްސަލައިގެ އަސާސީ އަދަބެއް ގޮތުން އަންނާނީ ހަތަރު މަހާއި 24 ދުވަހުގެ ޖަލު ހުކުމެކެވެ. އެކަމަކު ޝަރީއަތަށް އެއްބާރުލުންދީ ކުށަށް އިއުތިރާފުވުމުން އަދަބު ލުއިކޮށްދެ އެވެ.
އަދަބު ލުއިކޮށްދިނުމަށްފަހު މައްސަލަ ބެއްލެވި މެޖިސްޓްރޭޓް ވަނީ، ޑޮލަރު މާރު ކުރި މީހާގެ މައްޗަށް ތިން މަހާއި 18 ދުވަހުގެ ޖަލު ހުކުމެއް އިއްވައި، އެ ހުކުމް 21،600 ރުފިޔާގެ ޖޫރިމަނާއަކަށް ބަދަލުކޮށްދީފަ އެވެ. 21600 ރުފިޔާއަކީ ބޭންކް ރޭޓުން ގާތްގަނޑަކަށް 1400 ޑޮލަރެވެ. ޖޫރިމަނާގެ ފައިސާ، ހަތަރު މަސް ދުވަހުގެ ތެރޭގައި ދައްކަން، އާދިއްތަ ދުވަހު ވަނީ ހުކުމްކޮށްފަ އެވެ.