ފަނަރަ ބަސްތާ ސިމެންތި ވަގަށް ނެގި ކަމަށް ތުހުމަތު ކުރެވޭ މީހަކު ހޯދުމަށް ފުލުހުންގެ މައްޗަށް ދެ ފަހަރެއްގެ މަތިން ކުޅުދުއްފުށީ މެޖިސްޓްރޭޓް ކޯޓުން އަމުރުކޮށްފި އެވެ.
މައްސަލައިގެ ތުހުމަތުގައި ފުލުހުން ހޯދަމުން ދަނީ ހދ. ކުޅުދުއްފުށި، ދިގަލި ހާތިމް ޠާއީ ކިޔާ މީހެކެވެ.
އޭނާ ހޯދަން ފުލުހުންގެ މައްޗަށް ކޯޓުން އަމުރު ކުރީ އޭނާއާ ދެކޮޅަށް ދައުލަތުން އުފުލާފައިވާ ވައްކަމުގެ މައްސަލައަކާ ގުޅިގެން ކޯޓަށް ހާޒިރު ކުރާށެވެ.
ދެ ފަހަރެއްގެ މަތިން އޭނާ ހޯދައިދިނުމަށް ފުލުހުންގެ މައްޗަށް ކޯޓުން އަމުރު ކުރި ނަމަވެސް އޭނާ ހޯދިފައިނުވާތީ ކޯޓުން ވަނީ އޭނާގެ މައްޗަށް އުފުލާފައިވާ މައްސަލައިގެ ހުރިހާ ލިޔެކިޔުންތައް އަނބުރާ ޕީޖީ އޮފީހަށް ފޮނުވާލާފަ އެވެ.
މި މައްސަލަ ފޮނުވާލި ރިޕޯޓުން އެނގޭ ގޮތުގައި އެ މީހާ އުޅެމުންދަނީ ކަނޑުމަތީ ގައެވެ.
އޭނާ ކޯޓަށް ހާޒިރުވުމަށް ވައިބާ މެދުވެރިކޮށް ޗިޓް ފޮނުވި ނަމަވެސް ކޯޓަށް ހާޒިރުވެފައި ނުވާކަން ރިޕޯޓުން އެނގެ އެވެ.