ފުލުހުންގެ ބެލުމުގެ ދަށުގައި ހުރެ، ފުލުހުންގެ އަމުރަށް ގޮން ޖެހުމަށްފަހު "ބިޑިއެއް ބޯން" އުޅުނު މީހަކު ދެ އަހަރަށް ޖަލަށްލުމަށް ހުކުމްކޮށްފި އެވެ.
މިއީ ހދ. ކުޅުދުއްފުށީގައި ހިނގި ހާދިސާއަކާ ގުޅޭ މައްސަލަ އެކެވެ. މިދިޔަ ހަފްތާގައި ކުޅުދުއްފުށީ މެޖިސްޓްރޭޓް ކޯޓުން ނިންމި މި މައްސަލައިން އެނގޭ ގޮތުގައި ހދ. ފިނޭ، ވައިޖެހޭގެ، ހުސައިން ސާމިން ހައްޔަރު ކުރީ ކުޅުދުއްފުށީ ގެއަކުން ވައްކަން ކުރި ކަމުގެ ތުހުމަތުގައެވެ.
އޭނާ ހައްޔަރުކޮށް ފުލުހުންގެ ބެލުމުގެ ދަށުގައި ހުރެ، ބިޑިއެއް ރޯކުރަން އުޅުމުން އެކަން ނުކުރުމަށް ފުލުހުން އޭނާއަށް އެންގުމުން އެ އެންގުމަށް ތަބާނުވެ، ފުލުހަކަށް ހަމަލާ ދިނީ އެވެ.
ދައުލަތުން މި މައްސަލައިގައި އެ މީހާގެ މައްޗަށް އުފުލާފައިވަނީ އަނިޔާއެއް ދިނުމުގެ ކުށުގެ ދައުވާ އެވެ.
މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި ހުސައިން ޝާމިން ވަނީ އޭނާ ބިޑި ރޯކުރަން އުޅުމުން އެކަން ހުއްޓުވަން މަސައްކަތްކުރި ފުލުހެއްގެ ނޭފަތުގައި ވަކި އަޅައި އަދި މާރާމާރީ ހިންގާފަ އެވެ. މި މާރާމާރީގައި ފުލުހަކަށް އަނިޔާވެސް ވެފައިވެ އެވެ.
މި މައްސަލައިގެ ޝަރީއަތުގައި ދައުވާ ލިބުނު މީހާ ވަނީ އޭނާގެ މައްޗަށް ކުރެވުނު ތުހުމަތުތަކަށް އިންކާރުކޮށްފަ އެވެ. އެހެންކަމުން ޝަރީއަތަށް އޭނާގެ ކުށް ސާބިތުވީ ފުލުހުން ހުށަހެޅި ހެކިތަކުގެ އަލީގައެވެ. ކުށް ސާބިތުވުމުން އޭނާ އެދުނީ ލުއި އަދަބެއް ދިނުމަށެވެ. އެހެންނަމަވެސް އޭނާގެ މައްޗަށް ކުރިންވެސް ކުށެއް ސާބިތުވެފައިވާތީ އޭނާއަށް ލުއި އަދަބެއް ދެވޭނެ ގޮތެއް ނުވި އެވެ.
މި މައްސަލައިގައި އޭނާގެ މައްޗަށް ހުކުމް ކުރީ ދެ އަހަރު ދުވަހަށް ޖަލަށް ލުމަށެވެ. އެހެންނަމަވެސް މި މައްސަލައާ ގުޅިގެން އޭނާ ބަންދުކޮށްފައި ހުރި މުއްދަތު އުނިކުރުމުން ދެން އޭނާ ތަންފީޒު ކުރަން ޖެހެނީ 1 އަހަރާއި 11 މަހާއި 19 ދުވަހުގެ ޖަލު ހުކުމެކެވެ.