ގދ. ކަންޑެވާރެހާގައި އިންޓަގްރޭޓެޑް ޓޫރިސްޓް ރިސޯޓެއް ތަރައްގީކުރާނެ ބަޔަކު ހޯދަން ހޯނޑެއްދޫ ކައުންސިލްގެ އިދާރާއިން އިއުލާނުކޮށްފި އެވެ.
ހޯނޑެއްދޫއާ އެއް ފަޅެއްގައި އޮންނަ ކަންޑެވާރެހާއަކީ 4.6 ހެކްޓަރުގެ ރަށެކެވެ. ހޯނޑެއްދޫ އިން ސްޕީޑް ބޯޓެއްގައި ފަސް މިނެޓުން މިރަށަށް ދަތުރު ކުރެވެ އެވެ.
މި ރަށުގައި އިންޓަގްރޭޓެޑް ޓޫރިސްޓް ރިސޯޓް ތަރައްގީކުރަން ޝައުގުވެރިވާ ރާއްޖެ އާއި ރާއްޖެއިން ބޭރުގެ ކުންފުނިތަކަށް އެ ފުރުސަތު ވަނީ ހުޅުވާލާފަ އެވެ.
ރިސޯޓު ތަރައްގީކުރުމަށް އެއްބަސްވުމުގައި ސޮއިކުރާ ތާރީހުން ފެށިގެން 30 މަސް ދުވަސް ލިބޭއިރު ޓޫރިޒަމާ ބެހޭ ގާނޫނުގެ ދަށުން 50 އަހަރަށް ރަށް ދޫކުރުމަށް ހަމަޖެހިފައިވާ ކަމަށް ހޯނޑެއްދޫ ކައުންސިލުން ބުނެ އެވެ.
މި މަޝްރޫއުގެ ބިޑް ސެކިއުރިޓީގެ ގޮތުގައި ހަތް ލައްކަ އެމެރިކާ ޑޮލަރު ހޯނޑެއްދޫ ކައުންސިލް އިދާރާއަށް ހުށަހަޅަންޖެހެ އެވެ.
ހޯނޑެއްދޫ ކައުންސިލް އިދާރާއިން ވަނީ ކަންޑެވާރެހާގައި ތަރައްގީކުރާ ރިސޯޓުގެ ކުރެހުންތަކެއްވެސް އާންމުކޮށްފަ އެވެ.
ރިސޯޓު ތަރައްގީކުރަން ހުށަހަޅާފައިވަނީ ބީޗްވިލާ އާއި ޕްރައިވެޓް ޕޫލް ހިމަނައިގެންނެވެ.