ވެރިކަން ކުރާ ޕީއެންސީގެ އެތެރޭގެ އިންތިހާބު ފަސްކޮށްފި އެވެ.
މި އިންތިހާބު ބާއްވާ ގޮތަށް ކުރިން ހަމަޖެހިފައި އޮތީ އޮކްޓޫބަރު 19 ވަނަ ދުވަހު އެވެ.
ނަމަވެސް ޕީއެންސީ އިން ރޭ ނެރުނު ބަޔާނެއްގައި ބުނެފައިވަނީ މި އިންތިހާބު މިއަހަރުގެ ނޮވެމްބަރު ނުވަވަނަ ދުވަހަށް ފަސްކޮށްފައިވާ ކަމަށެވެ.
އިންތިހާބު ފަސްކުރި ސަބަބެއް ކަމަށް ބުނެފައިވަނީ މަގާމުތަކަށް ވާދަކުރަން ޝައުގުވެރިވާ މީހުން އިންތިހާބު ފަސްކޮށްދިނުމަށް އެދެމުން ދިއުން ކަމަށެވެ.
އިންތިހާބު ފަސްކޮށްފައިވާތީ މަގާމުތަކަށް ވާދަކުރަން ބޭނުންވާ މީހުން މަގާމުތަކަށް ކުރިމަތިލުމަށް އިތުރު ފުރުސަތެއް ދިނުމަށްވެސް ވަނީ ނިންމާފަ އެވެ. އެގޮތުން ކުރިއަށް އޮތް އޮކްޓޫބަރު 24 ވަނަ ދުވަހުގެ ނިޔަލަށް މިހާރު ވަނީ އެ ފުރުސަތު ހުޅުވާލާފަ އެވެ.
ޕީއެންސީގެ އެތެރޭގެ އިންތިހާބުގައި ވޯޓުލުމަށް ފުރުސަތު ދިނުމަށް ހަމަޖެހިފައިވަނީ ކުރިއަށް އޮތް އޮކްޓޫބަރު 24 ވަނަ ދުވަހުގެ އިރުއޮއްސި 6:00ގެ ނިޔަލަށް އެ ޕާޓީއަށް ސޮއިކޮށްފައިވާ މީހުންނަށް އެކަންޏެވެ.
ޕީއެެންސީގެ އިންތިހާބުގައި ހޮވުމަށް ހަމަޖެހިފައިވަނީ ދާއިރާ ރައީސުންނާއި، ދާއިރާ ނައިބްރައީސުންނާއި، ޒުވާނުންގެ ހަރަކާތުގެ ރަށު ރައީސްއާއި، އަންހެނުންގެ ހަރަކާތުގެ ރަށު ރައީސްއާއި، ސްޓިއަރިން ކޮމިޓީގެ މެންބަރުން އަދި އެ ކޮމިޓީގެ އިންތިހާބީ މަގާމުތަކެވެ.