އައިލެންޑް އޭވިއޭޝަން ސާވިސަސް ލިމިޓެޑް (އައިއޭއެސްއެލް) އިން ހިންގަމުން ގެންދާ "މޯލްޑިވިއަން ސީޕްލޭން"ގެ ހިދުމަތް އިތުރަށް ފުޅާކުރުމަށްޓަކައި އައިއޭއެސްއެލް އިން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)އާއެކު ޖޮއިންޓް ވެންޗާ ކުންފުންޏެއް ހެދުމަށް ރައީސުލްޖުމްހޫރިއްޔާ ނިންމަވައިފި އެވެ.
ރައީސް އޮފީހުން ބުނީ ވަޒީރުންގެ މަޖިލީހުގެ އިއްޔެގެ ބައްދަލުވުމުގައި ވަޒީރުން ދެއްވެވި ލަފައާއި އެކު މި ކުންފުނި އުފެއްދުމަށް ރައީސް ނިންމެވީ މޯލްޑިވިއަން ސީޕްލޭންގެ ވިޔަފާރި ޒަމާނީކޮށް، އިތުރަށް ފުޅާކޮށް ދެމެހެއްޓެނިވި ގޮތެއްގައި ކުރިއަށް ގެންދިއުމުގެ ގޮތުން އެމްއޭސީއެލްއާ އެކު ސްޓްރެޓީޖިކް ޕާޓްނާޝިޕެއް ގާއިމުކޮށް، މި ޕާޓްނާޝިޕްގެ ދަށުން ސީޕްލޭން ހިދުމަތް ދިނުމުގެ ބޭނުމުގައި ކަމަށެވެ.
ރައީސް ނިންމަވާފައިވަނީ އައިއޭއެސްއެލްގެ ފުރިހަމަ ކޮންޓްރޯލް އޮންނަ ގޮތަށް އެމްއޭސީއެލްއާ އެކު ޖޮއިންޓް ވެންޗާ ކުންފުންޏެއް އުފެއްދެވުމުގެ ކަންކަން އަންނަ އަހަރުގެ އޭޕްރީލް 30ގެ ނިޔަލަށް ނިންމެވުމަށާއި އަދި މި ކުންފުނި އުފެއްދެމުމަށްޓަކައި ނިންމަންޖެހޭ ކަންކަން އިކޮނޮމިކް ކައުންސިލަށް ހުށަހަޅައިގެން ކުރިއަށް ގެންދިއުމަށެވެ.
ވަޒީރުންގެ މަޖިލީހުގެ އިއްޔެގެ ބައްދަލުވުމުގައި ރާއްޖޭގެ އިގްތިސާދު ސިންދަފާތުކޮށް ކަނޑުގެ ވަސީލަތްތަކުން ލިބޭ ނަފާ އިތުރުކުރުމުގެ ގޮތުން، ކުރިއަށް ގެންދާނެ ކަންތައްތަކެއްވެސް ވަނީ ނިންމަވާފަ އެވެ. މިކަންތައްތައް ނިންމަވާފައިވަނީ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން ހުށަހެޅުއްވި ކަރުދާހަށް ވަޒީރުންގެ މަޖިލީހުގައި މަޝްވަރާކުރެއްވުމަށް ފަހު އެވެ.
އެގޮތުން ނިންމެވި ކަންކަމުގެ ތެރޭގައި ރާއްޖޭގައި މެރިކަލްޗާގެ ވިޔަފާރިތައް ގާއިމުކުރުމަށްޓަކައި، ހެޗަރީތައް ބިނާކުރުމާއި ހެޗަރީގައި އުފައްދާ ބާވަތްތައް މޫދުގެ މާހައުލުގައި ބޮޑުކުރުމަށް، ފޮރިން އިންވެސްޓްމަންޓްތައް ހިމެނޭ ގޮތަށް އާންމުކޮށް ހުޅުވާލައިގެން، ވަކި ޒޯނުތަކެއް މެރިކަލްޗާ ތަރައްގީ ކުރާ ޒޯންތަކެއްގެ ގޮތުގައި ކަނޑައެޅުންވެސް ހިމެނެ އެވެ.
އެގޮތުން ކަނޑައެޅި ޒޯންތަކަކީ:
- ބޮޑުތިލަދުންމަތި (ހދ. އަދި ށ. އަތޮޅު) މެރިކަލްޗާ ޒޯން
- މާޅޮސްމަޑުލު އުތުރުބުރީ (ރ) އަތޮޅު މެރިކަލްޗާ ޒޯން
- މުލަކަތޮޅު (މ) އަތޮޅު މެރިކަލްޗާ ޒޯން
- ކޮޅުމަޑުލު (ތ) އަތޮޅު މެރިކަލްޗާ ޒޯން
މީގެ އިތުރުން މާލެއަތޮޅު ދެކުނުން، ވާދޫ ކަނޑުއޮޅިން ފެށިގެން ގާތްގަނޑަކަށް ހަތް ކިލޯމީޓަރު ދެކުނުން އޮތް ޖުމްލަ 73 ހެކްޓަރުގެ ފަރުގެ ސަރަހައްދަކީ ކޮމާޝަލް ސްކޭލެއްގައި ފާނަ އާލާކުރުމުގެ މަސައްކަތް ހިންގުމަށް ހާއްސަކުރެވޭ މޫދުކޮށީގެ ސަރަޙައްދެއްގެ ގޮތުގައި ކަނޑައެޅުމާއި މެރިކަލްޗާ ކުރުމަށް ކަނޑައަޅާ ޒޯނުތައް ކުއްޔަށް ދިނުމުގައި ޢަމަލުކުރާނެ އުސޫލުތަކެއް ކަނޑައެޅުން ހިމެނެ އެވެ.