ފާނަ އާލާކުރަން ބޮޑު ސަރަހައްދެއް ކަނޑައަޅަން ސަރުކާރުން ނިންމައިފި އެވެ.
ސަރުކާރުން މި ގޮތަށް ނިންމީ ހޯމަ ދުވަހު ބޭއްވި ވަޒީރުން މަޖިލީހުގައި ފިޝަރީޒް މިނިސްޓްރީން ހުށަހެޅި ކަރުދާހަކަށް މަޝްވަރާ ކުރުމަށްފަހު ކަމަށް ރައީސް އޮފީހުން ބުނެ އެވެ.
އެ ގޮތުން މާލެ އަތޮޅު ދެކުނުން ވާދޫ ކަނޑުއޮޅިން ފެށިގެން ގާތްގަނޑަކަށް ހަތް ކިލޯމީޓަރު ދެކުނުން އޮތް ޖުމްލަ 73 ހެކްޓަރުގެ ފަރުގެ ސަރަހައްދަކީ ކޮމާޝަލް ސްކޭލެއްގައި ފާނަ އާލާކުރުމުގެ މަސައްކަތް ހިންގުމަށް ހާއްސަ ކުރެވޭ ސަރަހައްދެއްގެ ގޮތުގައި ކަނޑައެޅުމަށް ނިންމާފައިވާ ކަމަށް ރައީސް އޮފީހުން ބުނެ އެވެ.
ކެބިނެޓް މަޝްވަރާތަކަށްފަހު ސަރުކާރުން ވަނީ ހަތަރު ޒޯނެއްގައި މެރިކަލްޗާ ތަރައްގީކުރަން ނިންމާފަ އެވެ.
މެރިކަލްޗާ ތަރައްގީކުރަން ކަނޑައެޅި ޒޯންތަކަކީ ހދ. އާއި ށ. އަތޮޅުގެ ޒޯން އާއި ރ. އަތޮޅުގެ މެރިކަލްޗާ ޒޯންގެ އިތުރުން މ. އަތޮޅުގެ މެރިކަލްޗާ ޒޯން އަދި ތ. އަތޮޅުގެ މެރިކަލްޗާ ޒޯން އެވެ.