ރައްޔިތަކުން ފުލުހެއްގެ ކައިރިއަށް ކަމަކު ގޮސްފިނަމަ މާޔޫސްކޮށް ނުލުމަށް ކޮމިޝަނާ އޮފް ޕޮލިސް އަލީ ޝުޖާއު އެދިވަޑައިގެންފި އެވެ.
ކޮމިޝަނާ ޝުޖާއު ފުލުހުންގެ ކިބައިން މިކަމަށް އެދިވަޑައިގަތީ ކޮމިޝަނާ ހއ. އަތޮޅަށް ކުރައްވަމުންދާ ރަސްމީ ދަތުރުފުޅުގެ ތެރެއިން އެ އަތޮޅުގެ ބައެއް ރަށްތަކުގައި މަސައްކަތް ކުރާ ފުލުހުންނާ ބައްދަލުކުރެއްވުމަށްފަހު އެވެ.
މިބައްދަލުވުންތަކުގައި ކޮމިޝަނާ ޝުޖާއު ވަނީ ރައްޔިތަކު ބޭނުމެއް ޖެހިގެން ފުލުހުން ކައިރިއަށް އައިސްފިނަމަ އެ މީހަކު މާޔޫސްކޮށް ނުލުމަށް ފުލުހުންނަށް ވަރަށް ބޮޑަށް އިރުޝާދު ދެއްވާފަ އެވެ. މީގެ އިތުރުން ރައްޔިތުންނާ ބައްދަލުވެ، އެމީހުންގެ ކަންބޮޑުވުންތައް އޮޅުންފިލުވައި، ރައްޔިތުންނާ ގާތުން ފުލުހުންގެ ހިދުމަތް ފޯރުކޮށްދިނުމަށްވެސް އެދިވަޑައިގެންނެވި އެވެ.
ކޮމިޝަނާ ޝުޖާއު ވަނީ ރަށްރަށުގެ ތަރައްގީގެ މަސައްކަތްތަކުގައި ފުލުހުންގެ ދައުރު މުހިއްމު ކަން ފާހަގަކުރައްވާ ވީވަރަކުން އެފަދަ ކަންކަމުގައި ފުލުހުން ބައިވެރިވުމަށްވެސް އެދިވަޑައިގެންފަ އެވެ.
ކޮމިޝަނާ ހއ. އަތޮޅަށް ކުރައްވާ ދަތުރުފުޅުގެ މައިގަނޑު މަގުސަދަކީ ރަށްރަށުގެ ކުށުގެ ހާލަތާއި ރައްޔިތުންގެ ކަންބޮޑުވުންތައް ދެނެގަނެ އެކަންކަން ހައްލުކުރުމަށް ކުރެވިދާނެ މަސައްކަތްތަކާ ގުޅޭގޮތުން މަޝްވަރާކުރުން ކަމަށް ފުލުހުންގެ އިދާރާ އިން ބުނެ އެވެ.
ކޮމިޝަނާ ޝުޖާއުގެ މިދަތުރުފުޅުގައި އިއްޔެ ވަޑައިގަތީ ދިއްދޫ، ކެލާ އަދި އުތީމަށެވެ. މި ރަށްރަށުގެ ކައުންސިލް މެމްބަރުންނާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާ ވެސް ކޮމިޝަނާ ބައްދަލުކުރެއްވި އެވެ.