ފުރަތަމަ ޓާމު ނިމި ލިބުނު ޗުއްޓީއަށްފަހު ސްކޫލުތަކުގައި ދެވަނަ ޓާމުގެ ކިޔެވުން މިއަދު ފަށައިފި އެވެ.
ދިރާސީ އަހަރުގެ ފުރަތަމަ ޓާމަށްފަހު ދަރިވަރުންނާއި މުދައްރިސުން ޗުއްޓީއަށް ދިޔައީ މިދިޔަ މަހުގެ 26ވަނަ ދުވަހު އެވެ. ޗުއްޓީގެ ގޮތުގައި ލިބުނީ ޖުމްލަ 10 ދުވަހެވެ.
ދެވަނަ ޓާމުގެ ކިޔެވުން މިއަދު ފެށިއިރު މި ޓާމުގެ ކިޔެވުން ނިމޭނީ އަންނަ އަހަރުގެ މާޗް ހަވަނަ ދުވަހު އެވެ.
ސްކޫލުތަކުގައި ކިޔެވުން ފަށާފައިވާއިރު ގިނަ ސްކޫލުތަކުގައި މިއަދު ދަނީ ޓީޗަރުންގެ ދުވަސް ވެސް ފާހަގަކުރަމުންނެވެ. ބައިނަލްއަގްވާމީ ޓީޗަރުންގެ ދުވަހަކީ އޮކްޓޫބަރު މަހުގެ ފަސްވަނަ ދުވަހެވެ.
ދިރާސީ އަހަރުގެ ކިޔެވުން މިއަހަރު ފެށީ 96،000 ދަރިވަރުންނާއެކު އެވެ. އެގޮތުން ސަރުކާރުގެ 217 ސްކޫލުގައި 83،000 އެއްހާ ދަރިވަރުން އަދި ޕްރައިވެޓް ސްކޫލުތަކުގައި 13،000 ދަރިވަރުން ކިޔަވާފައިވެ އެވެ.
ދިރާސީ އަހަރު ފެށިއިރު އެޑިޔުކޭޝަން މިނިސްޓްރީން ހާމަކުރި ގޮތުގައި ރަށްރަށުން 1،126 ދަރިވަރުން މާލެ ސަރަހައްދުގެ ސްކޫލުތަކަށް ބަދަލުވެފައިވެ އެވެ.
ސަރުކާރުގެ ސްކޫލުތަކުގައި މިއަހަރުގެ ދިރާސީ އަހަރު 12،000 އަށް ވުރެ ގިނަ ޓީޗަރުން މަސައްކަތް ކުރާއިރު މީގެ ތެރެއިން 10،700 ޓީޗަރުންނަކީ ދިވެހިންނެވެ.