ވެރިކަން ކުރާ މައި ޕާޓީ -- ޕީއެންސީގެ މެމްބަރުންގެ އަދަދު 60،000 އަށް ވުރެ މައްޗަށް އަރާފައިވާ ކަމަށް ރައްޔިތުންގެ މަޖިލިހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.
ޕީއެންސީ އިން އިއްޔެ ކުރިއަށް ގެންދިޔަ މެންބަޝިޕް އިތުރުކުރުމުގެ ހަރަކާތަށްފަހު އަބްދުއްރަހީމް ވިދާޅުވީ ޕީއެންސީގެ އަމާޒަކީ މިއަހަރުގެ ނޮވެމްބަރުގެ ނިޔަލަށް 75،000 މެންބަރުން ޕީއެންސީއަށް ވެއްދުން ކަމަށެވެ.
"ރައީސް ޑރ. މުހައްމަދު މުއިއްޒުގެ މިއަމާޒަށް ވާސިލްވެވޭނެ ކަމުގެ ޔަގީންކަން މިހާރު އެބައޮތް،" އަބްދުއްރަހީމް ވިދާޅުވި އެވެ.
އޭނާ ވިދާޅުވީ މެންބަރުން އިތުރުކުރުމުގެ ހަރަކާތަކީ ރައީސް ޑރ. މުއިއްޒު އިސްނަންގަވައިގެން އެމަނިކުފާނުގެ ލަފާފުޅާއި އިރުޝާދާ އެކީގައި ކުރިއަށް ގެންދަވާ ހަރަކާތެއް ކަމަށެވެ. މިމަސައްކަތުގައި އިސްވެ އެންމެ ބޮޑަށް މަސައްކަތް ކުރައްވަނީ މަޖިލީހުގެ މެމްބަރުންނާއި، ޕާޓީއަށް ނިސްބަތްވާ ވަޒީރުންނާއި އެހެން އިސް ބޭފުޅުން ކަމަށްވެސް ވިދާޅުވި އެވެ.
ރައީސް ޑރ. މުއިއްޒުގެ އަމާޒަކީ އަންނަ މަހުގެ 17 ވަނަ ދުވަހަށް 75،000 މެންބަރުންނާ އެކު ޕީއެންސީއަކީ ރާއްޖޭގައި އޮތް އެންމެ މެމްބަރުން ގިނަ ޕާޓީއަށް ހެދުމެވެ.
އަބްދުއްރަހީމް ވިދާޅުވީ ރާއްޖޭގައި މިހާތަނަށް އުފެދުނު އެއްވެސް ސިޔާސީ ޕާޓީއަކަށް މިހާ ކުރު މުއްދަތެއްގައި މިހާ ގިނަ މެމްބަރުން ވަދެފައި ނުވާ ކަމަށެވެ.
ޕީއެންސީއަށް ލިބެމުންދާ ކާމިޔާބީގެ ސިއްރަކީ ރައީސް މުއިއްޒު ގައުމާ ދޭތެރޭ ގެންގުޅުއްވާ ތަސައްވުރާއި ރައްޔިތުންނާ ގާތުން ކުރާ މަސައްކަތް ކަމަށްވެސް އަބްދުއްރަހީމް ވިދާޅުވި އެވެ.
"މިއަދު ފެނިގެން މިދަނީވެސް ރައީސް ޑރ. މުހައްމަދު މުއިއްޒުގެ ސިޔާސަތަށް ރައްޔިތުން ތާއީދުކުރާ މިންވަރު،" އަބްދުއްރަހީމް ވިދާޅުވި އެވެ.