އިޒުރޭލުގެ އުދުވާނީ ހަމަލާތަކަށް ކެތްނުކުރެވިގެން 420،000 މީހުން ލުބްނާން ދޫކޮށް ސީރިއާއަށް ވަދެއްޖެ އެވެ. އދގެ ރެފިއުޖީ އޭޖެންސީން ބުނި ގޮތުން މިއީ އަދި ސީރިއާއަށް ވަދެފައިވާ އަަދަދެވެ.
ލުބްނާންގެ އެންމެ އާބާދީ ބޮޑު ބޭރޫތަށް އިޒުރޭލުން ދަނީ ކެނޑިނޭޅި ހަމަލާދެމުންނެވެ. އިޒުރޭލުގެ ދިފާއީ ބާރު، އައިޑީއެފުން ބުނާ ގޮތުން ހަމަލާތަކުގެ އަމާޒަކީ ހިޒްބުﷲ އެވެ.
ނަމަވެސް އދގެ އިންސާނީ ހައްގުތަކާ ބެހޭ އޮފީހުގެ ތަރުޖަމާން ރަވީނާ ޝަމްދަސާނީ ވިދާޅުވި ގޮތުން އިޒުރޭލުގެ ހަމަލާތަކުން އެންމެ ބޮޑަށް ގެއްލުން ލިބެނީ އާންމު ފަރުދުންނަށެވެ.
ލުބްނާން ބޯޑަރު ހުރަސްކޮށް ސީރިއާއަށް ވަތް މީހުންގެ އަދަދު މިހާ ބޮޑަށް މައްޗަށް އަރާފައިވާއިރު، ވަޒަން ދޫކޮށް އެކި ތަންތަނަށް ގޮސްފައިވާ މީހުން މިލިއަނަކަށް ވުރެ އިތުރުވާނެ ކަމަށް ތަރުޖަމާން ވިދާޅުވި އެވެ.
އިޒުރޭލުގެ ހަމަލާތައް ހިޒްބުﷲއަށް އަމާޒުކުރަމުން ދާއިރު، ހިޒްބުﷲ އަދި ގުޅިފައި ތިބި ހަނގުރާމަވެރި ޖަމާއަތްތަކުން އިޒުރޭލަށް ވެސް ބޮޑެތި ގެއްލުންދީފައިވާ ކަމަށް ތަރުޖަމާން ވިދާޅުވި އެވެ.
ލުބްނާންގެ ހެލްތު މިނިސްޓްރީން ބުނާ ގޮތުން އިޒުރޭލުގެ ހަމަލާތައް އެއްވާނެއްގައި ހިފަހައްޓައިފިނަމަ، ޒަހަމްވާ މީހުންނަށް ފަރުވާދެވޭނެ ގޮތެއް ނޯންނާނެ އެވެ. ސިއްހީ މަރުކަޒުތަކާއި ހޮސްޕިޓަލްތައް ތޮއްޖެހިފައިވާ ކަމަށްވެސް ތަރުޖަމާން ވިދާޅުވި އެވެ.
އިޒުރޭލުގެ ހަމަލާތަކުގައި 100 އެއްހާ މެޑިކަލް އޮފިސަރުން މަރުވެފައިވާ ކަމަށްވެސް ހެލްތު މިނިސްޓްރީން ބުންޏެވެ.
ފަލަސްތީންގެ ޣައްޒާއަށް މީގެ އަހަރެއްހާ ދުވަސްކުރިން އިޒުރޭލުން ދޭން ފެށި ހަމަލާތައް އަދިވެސް ދަނީ ކުރިއަށެވެ. އިޒުރޭލުގެ ހަމަލާތަކުން ކުރިފަޅައި މިހާރު ލުބްނާނަށް ފޯރާފައި އޮތްއިރު -- ދޭތެރެ ދޭތެރެއިން ޔަމަނަށާއި ސީރިއާއަަށް ވެސް އިޒުރޭލުން ހަމަލާދެ އެވެ.
އިޒުރޭލުގެ ދިފާއީ ބާރު -- އައިޑީއެފުން ބުނާ ގޮތުން ޔަމަނުގައި ހަރަކާތްތެރިވާ ހުސީންނާއި ސީރިއާގައި އަސަދަށް ވަފާތެރި ހަނގުރާމަވެރިންވެސް އިޒުރޭލާ ދެކޮޅަށް ހަރަކާތްތެރިވެ އެވެ. އަދި މި ޖަމާއަތްތަކަކީ އިރާނުން މަދަދު ހޯދައިގެން ހަރަކާތްތެރިވާ ބައެއް ކަމަށް އައިޑީއެފުން ބުނެ އެވެ.