ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ ކުރީގެ ރަންވޭ އަލުން ތަރައްގީ ކުރުމަށް ޗައިނާގެ ބެއިޖިން އާބަން ކޮންސްޓަރަކްޝަން ގްރޫޕް ބީސީ ޖީޔޫ އާއި ހަވާލުކޮށްފި އެވެ.
މި މަޝްރޫއުގައި ސޮއިކުރުމަށް ބޭއްވި ރަސްމިއްޔާތުގައި އެމްއޭސީއެއްލްގެ ފަރާތުން ސޮއި ކުރެއްވީ އެކުންފުނީގެ މެނޭޖިން ޑިރެކްޓަރު އިބުރަހީމް ޝަރީފް މުހައްމަދު އެވެ. އަދި ބީޔޫސީޖީގެ ފަރާތުން ސޮއިކުރެއްވީ އެކުންފުނީގެ ޖެނެރަލް މެނޭޖަރު ލުއޯ ވޭއި އެވެ.
މި ރަސްމިއްޔާތުގައި ވާހަކަ ދައްކަވަމުން އެމްއޭސީއެލްގެ މެނޭޖިން ޑިރެކްޓަރު އިބްރަހީމް ޝަރީފް މުހައްމަދު ވިދާޅުވީ މިހާރު ޓެކްސީވޭއެއްގެ ގޮތުގައި ބޭނުން ކުރަމުންދާ ކުރީގެ ރަންވޭ އަކީ އެއާޕޯޓުގައި އެންމެ ގިނަ ދުވަސްވީ އިންފުރާންސްޓްރަކްޗާ ކަމަށެވެ.
މިހާރުގެގެ ރަންވޭއަށް ކަމެއް ދިމާވެއްޖެނަމަ ބޯޓުތައް ޖެއްސޭނެ އިތުރު ގޮތެއް ނޯންނާނެ ކަމަށާއި، ރަންވޭ ބަންދުކުރަން ޖެހޭ ހާލަތްތައް މަދުން ނަމަވެސް އަންނާނެ ކަމަށެވެ. އެހެންވެ ކުރީގެ ރަންވޭ ވެސް ބޭނުންކުރަން ޖެހިއްގެ ހާލަތެއްގައި ބޭނުންކުރެވޭ ގޮތަށް އޮތުމަކީ މުހިއްމު ކަމެއް ކަމުގައިވެސް ވިދާޅުވި އެވެ.
"އެއީ އާޕޯޓުގައި އެންމެ ގިނަ ދުވަސްވީ އިންފުރާންސްޓްރަކްޗާ. އެއީ 1970 ވަނަ އަހަރު ހަދާ ފައިވާ ތަނެއް،" ޝަރީފް ވިދާޅުވި އެވެ.
މިމަޝްރޫއުގެ މަސައްކަތް އަންނަ މަހު ފެށުމަށް ނިންމާފައިވާއިރު މިމަސައްކަތް އެއްކޮށް ނިންމަން ކަނޑައަޅަފައިވަނީ 2027 ވަނަ އަހަރުގެ މެދު ތެރެއަށެވެ. ރަންވޭގެ ދިގުމުނުގައި 3،200 މީޓަރު ހުންނާނެ ކަމަށް އެމްއޭސީއެލް އިން ބުނެ އެވެ.
މިހާރު ބޭނުންކުރަމުންދާ އާރަންވޭ ހަދާފައިވަނީވެސް ބީޔޫސީޖީއިންނެވެ. އާ ރަންވޭގެ ދިގުމިނުގައި 3،400 މީޓަރު އަދި ފުޅާމިނުގައި 60 މީޓަރު ހުރެ އެވެ. އާ ރަންވޭ އަށް އެންމެ ބޮޑެތި ބޯޓު، އޭ380 މަރުކާގެ ބޯޓުތަކަށް ވެސް ޖެއްސޭނެ އެވެ. އެ ޕްރޮޖެކްޓަށް 450 މިލިއަން ޑޮލަރު ހޭދަކޮށްފައިވެ އެވެ.