ޑްރަގް ފަރުވާ ހޯދުމަށް ކޯޓުން އަމުރުކުރާ މީހުން ފަރުވާގެ މަރުހަލާގައި އެއްބާރުލުން ނުދޭނަމަ ގާނޫނީ ފިޔަވަޅު އެޅުމަށް މަޝްވަރާކޮށްފި އެވެ.
ނެޝަނަލް ޑްރަގް އޭޖެންސީ (އެންޑީއޭ) އިން ބުނީ ޑްރަގް ކޯޓާއެކު ބޭއްވި ބައްދުލުވުމެއްގައި ޑްރަގު ފަރުވާގެ ނިޒާމު ހަރުދަނާކުރުމުގެ މަޝްވަރާތައް ކުރި ކަމަށެވެ. އެގޮތުން ފަރުވާއަށް ހުކުމް ކުރާ ފަރާތްތަކުގެ އެއްބާރުލުން ހޯދުމާއި އެއްބާރުލުން ނުދޭ މީހުންނާ މެދު ގާނޫނީ ފިޔަވަޅު އަޅަން މަޝްވަރާކޮށްފައިވާ ކަމަށްވެސް ބުންޏެވެ.
އެންޑީއޭއިން ބުނީ އޭގެ ސަބަބުން ޑްރަގު ފަރުވާގެ ނިޒާމު އިތުރަށް ހަރުދަނާވެ، ފަރުވާ ލިބިގަންނަ މީހުންނަށް ފައިދާކުރާނެ ކަމަށެވެ.
ރީހެބިލިޓޭޝަންގެ ނިޒާމު ހަރުދަނާ ކުރުމަށްޓަކައި އެކަމަށް މިއަހަރު ހާއްސަކޮށްފައިވާ 117 މިލިއަން ރުފިޔާގެ ބަޖެޓަށް 30 މިލިއަން ރުފިޔާ އިތުރުކުރުމަށް ވެސް ސަރުކާރުން މިހާރު ވަނީ ނިންމާފަ އެވެ. ރިހިބިލިޓޭޝަން ޕްރޮގްރާމްތައް ހިންގަނީ އަދި އިންތިޒާމުކުރަނީވެސް ސަރުކާރުން ދޭ ފައިސާ އިންނެވެ.
ޑްރަގު ކޯޓާއި އެންޑީއޭ ގުޅިގެން ޑްރަގު ފަރުވާގެ ނިޒާމު ހަރުދަނާކުރުމަށް ދެ ފަރާތުން ދޭންޖެހޭ އެއްބާރުލުން ދިނުމަށްވެސް ބައްދަލުވުމުގައި މަޝްވަރާކުރި ކަމަށް އެންޑީއޭއިން މައުލޫމާތުދެ އެވެ.
