ކުރިއަށް އޮތް ނޮވެމްބަރު 15 ވަނަ ދުވަހުން ފެށިގެން ސިނގިރެޓް ބުއިން ހުއްޓާލައްވާނެ ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.
އައްބާސް މިކަން އިއުލާންކުރެއްވީ ރާއްޖެއަށް ނޮވެމްބަރު 1 އިން 15އާ ދެމެދު އެތެރެކުރާ ވޭޕްގެ ބާވަތްތަކާއި އާލާތްތަކުން ނަގާ ޓެކްސް ބޮޑުކުރުމަށް ޓެކްސް ނެގުމާ ބެހޭ އިދާރީ ގާނޫނަށް މަޖިލީހުގެ ޖަލްސާގައި މިއަދު ބަހުސްކުރައްވަމުންނެވެ.
މި ބިލްގެ ބަހުސްގައި ސަރުކާރަށް ތާއީދުކުރައްވާ ބައެއް މެންބަރުން ވަނީ ވޭޕް ބޭންކުރުމާއި ސިނގިރެޓް ބުއިން ހުއްޓާލުމަށް ރައްޔިތުންނަށް ނަމޫނާ ދެއްކެވުމުގެ ގޮތުން މެންބަރުން އެކަންކަން ހުއްޓާލުމަށް އެދިވަޑައިގެންފަ އެވެ.
ބައެއް މެންބަރުންގެ އެދިވަޑައިގަތުމާ ގުޅިގެން ބަހުސްގައި ވާހަކަދައްކަވަމުން އައްބާސް ވިދާޅުވީ އެކަމުގައި ނަމޫނާ ދެއްކެވުމުގެ ގޮތުން ނޮވެމްބަރު 15 ވަނަ ދުވަހުން ފެށިގެން ސިނގިރެޓް ބުއިން ހުއްޓާލައްވާނެ ކަމަށެވެ.
"ޖަވާބުގައި އިހްތިރާމާ އެކީ ދަންނަވާނީ އަޅުގަނޑަކީ ދުވާލަކު ދެ ފޮށި ސިނގިރެޓް މިހާރުވެސް ބޯ މީހެއް އިއްޒަތްތެރި ރައީސް. ނޮވެމްބަރު 15 ވަނަ ދުވަހުން ފެށިގެން މާތްﷲގެ ތަނަވަސް ރަހްމަތާ އެކު ސިނގިރެޓް ބުއިން ހުއްޓާލަން އަޅުގަނޑު ނިންމައިފިން އިއްޒަތްތެރި ރައީސް،" އައްބާސް ވިދާޅުވި އެވެ.
ނޮވެމްބަރު 15 ވަނަ ދުވަހަކީ ވޭޕްކުރަން ބޭނުންކުރާ ތަކެއްޗާއި އޭގެ ވަކިވަކި ބައިތައް ރާއްޖެ އެތެރެކުރުން މަނާކުރަން ރައީސް ޑރ. މުހައްމަދު މުއިއްޒު ނިންމަވާފައިވާ ނިންމެވުން ތަންފީޒު ކުރަން ފަށާ ދުވަހެވެ.
މަޖިލީހުގެ ބަހުސްގައި އައްބާސް ވަނީ ވޭޕާއި ސިނގިރެޓްގެ ބާވަތްތަކުގެ ޑިއުޓީ ބޮޑުކުރަން ހުށަހަޅާފައިވާ އިސްލާހުތަކަށް އެމްޑީޕީގެ ބައެއް މެންބަރުން ފާޑުކިޔާފައިވާތީ އެކަމަށްވެސް ރައްދުދެއްވާފަ އެވެ. އެގޮތުން އައްބާސް ވިދާޅުވީ ބައެއް މެންބަރުން ސަރުކާރުން ހުށަހަޅާފައިވާ އިސްލާހުތަކަށް ދެކޮޅު ހައްދަވަނީ އެ ބޭފުޅުންގެ ސިޔާސީ އައްޑަނައަކަށް ޒުވާނުން ހަދަން ބޭނުންވާތީ ކަމަށެވެ.
ވޭޕާއި ސިނގިރެޓްގެ ބާވަތްތަކުގެ ޑިއުޓީ ބޮޑުކުރަން ހުށަހަޅާފައިވާ އިސްލާހުތަކަށް 100 ޕަސަންޓް ތާއީދުކުރައްވަމުން އައްބާަސް ވިދާޅުވީ މިއިސްލާހުތަކަކީ އަންނަން އޮތް ޖީލުތައް ދުންފަތާއި މަސްތުވާތަކެތީގެ ވަބާއިން ސަލާމަތް ކުރުމަށް އަޅާ ވަރަށް ހަރުދަނާ ފިޔަވަޅެއް ކަމަށެވެ. އަދި މިފަދަ އިސްލާހުތަކެއް މަޖިލީހަށް ހުށަހެޅުމަށް ނިންމެވީތީ އައްބާސް ވަނީ ރައީސް މުއިއްޒަށާއި ވަޒީރުންގެ މަޖިލީހުގެ މެންބަރުންނަށް ޝުކުރުވެސް އަދާކުރައްވާފަ އެވެ.
"ހަގީގަތުގައި މިއިސްލާހުތަކަށް 95 ޕަސަންޓް ރައްޔިތުން ތާއީދުކުރޭ،" އައްބާސް ވިދާޅުވި އެވެ.
އޭނާ ވިދާޅުވީ ބައެއް ޒުވާނުން އެމީހުންގެ އާއިލާތަކަށް ނުކުރާ ހޭދަ ވޭޕާއި ސިނގިރެޓްގެ ބާވަތްތަކަށް ކުރާ ކަމަށެވެ. އެހެންކަމުން ވޭޕާއި ސިނގިރެޓްގެ ބާވަތްތަކުގެ ޑިއުޓީ ބޮޑުކުރަން ހުށަހަޅާފައިވާ އިސްލާހާ ގުޅިގެން ދިވެހި ގައުމުގެ އިގްތިސާދާއި އާއިލާތަކުގެ ދިރިއުޅުމުގެ ހާލަތު ރަނގަޅުވެ ބޭރު ފައިސާ ރާއްޖެއިން ބޭރުވާ ނިސްބަތްވެސް ރަނގަޅު ވާނެ ކަމަށްވެސް ވިދާޅުވި އެވެ.
"މިއީ ޒުވާން ޖީލަށް ކޮށްދޭ ހެޔޮކަމެއް. މިއީ އަންނަން އޮތް ޖީލަށް ކޮށްދޭ ހެޔޮ ކަމެއް. މިއީ މިއަދުގެ ކިޔަވާ ކުދިންނަށް ކޮށްދޭ ހެޔޮ ކަމެއް. މިއީ މުޅި މި ދިވެހި ގައުމަށް ކޮށްދޭ ހެޔޮ ކަމެއް،" އައްބާސް ވިދާޅުވި އެވެ.