މިއަހަރުގެ މިހާތަނަށް ގަވައިދަށް ހިލާފަށް ރާއްޖެ އެތެރެވުމަށް މަސައްކަތް ކުރި 51 ބިދޭސީއަކު އަނބުރާ ފޮނުވާލާފައިވާ ކަމަށް މޯލްޑިވްސް އިމިގްރޭޝަނުން ބުނެފި އެވެ.
ރައީސް އޮފީހުގައި މިއަދު ނޫސްވެރިންނަށް މައުލޫމާތު ދެއްވަމުން ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު ވިދާޅުވީ ކައުންޓަ ފީޓް ނުވަތަ ނަކަލް ކޮށްފައި ހުންނަ ޕާސްޕޯޓް ބޭނުންކޮށްގެން ރާއްޖެ އެތެރެވުމަށް ބިދޭސީންގެ ގިނަ ބަޔަކު މަސައްކަތް ކުރަމުންދާ ކަމަށެވެ.
ކޮންޓްރޯލާ ވިދާޅުވީ ޝަހްސް އޮޅުވާލައިގެން ވިޔަސް ނުވަތަ ޑޮކިއުމެންޓްތައް އޮޅުވާލައި ފޭކް ލިޔުންތައް ތައްޔާރުކޮށްގެން ރާއްޖެ އެތެރެވުމަށް ބިދޭސީއަކު މަސައްކަތް ކުރި ނަމަވެސް އެ މީހަކު ރާއްޖެއަށް އެތެރެވުމަށް ފުރުސަތު ނުދޭނެ ކަމަށެވެ.
"މިއަހަރު 51 ބިދޭސީއަކު އަޅުގަނޑުމެންގެ ބޯޑަރުން ވަނީ ހިފަހައްޓާފައި. މީގެތެރޭގައި ކައުންޓާ ފިޓް ޕާސްޕޯޓާއި ސަހްޝު އޮޅުވާލަން މަސައްކަތްކުރާ ޑޮކިއުމަންޓާއި އޭގެ ޖަހާފައި ހުރި ވިސާ ތަކަކީ ފޯޖްކޮށްފައި ހުރި ވިސާތަކެއްކަން ވަނީ ފާހަގަވެފައި،" ކޮންޓްރޯލާ ވިދާޅުވި އެވެ.
ޝަމްއާން ވިދާޅުވީ އިމިގްރޭޝަންގެ މިއަހަރުގެ އެއް އަމާޒަކީ ރާއްޖޭގައި ގަވައިދާ ހިލާފަށް އުޅޭ ބިދޭސީންގެ ތެރެއިން 5،000 މީހުން ހޯދައި އެ މީހުން ރާއްޖެ އިން ފޮނުވާލުން ކަމަށެވެ. އެ އަމާޒު ހާސިލްވާނެ ކަމުގެ ޔަގީންކަން ދެއްވަމުން ޝަމްއާން ވިދާޅުވީ މިއަހަރުގެ މިހާތަނަށް ގަވައިދާ ހިލާފަށް ރާއްޖޭގައި އުޅޭ 4،361 ބިދޭސީއަކު ރާއްޖެއިން ޑީޕޯޓްކޮށްލާފައިވާނެ ކަމަށެވެ.
ކޮންޓްރޯލާ ވިދާޅުވީ ރާއްޖެއިން ފޮނުވާލި ބައެއް މީހުންގެ ތެރޭގައި އަމިއްލަ ފުރަން ބޭނުންވެ އެކަމަށް އެދިގެން ފުރުވާލި ބަޔަކުވެސް ހިމެނޭ ކަމަށެވެ. ވަކި މީހަކަށް ނުވަތަ ވަކި ވިޔަފާރިއަކަށް ފައިދާވާނެ ގޮތެއް ހަދައިދިނުމަށްޓަކައި އެއްވެސް ބިދޭސީއަކާ ދެކޮޅަށް ނުހައްގުން އެއްވެސް ފިޔަވަޅެއް އަޅާފައި ނުވާނެ ކަމުގެ ޔަގީންކަންވެސް ކޮންޓްރޯލާ ދެއްވި އެވެ.