މާލޭގެ ޖޭޒް ކެފޭއާއި ޖެހިގެން ހުރި އިމާރާތެއްގައި ހަރުކޮށްފައި ހުރި ހޮޅިއަކުން އަރައިގެން އެ އިމާރާތަށް ވަންނަން އުޅުނު މީހަކު ޖޭޒް ކެފޭގެ ފުރާޅު މައްޗަށް ވެއްޓި އަނިޔާވެއްޖެ އެވެ.
މިހާދިސާ ފުލުހުންނަށް ރިޕޯޓްކޮށްފައިވަނީ ރޭ 11:14 ހާއިރު އެވެ.
ފުރާޅު މައްޗަށް ވެއްޓުނީ އުމުރުން 35 އަހަރުގެ ދިވެހި ފިރިހެނެކެވެ.
މި މީހާ ފުރާޅު މައްޗަށް ވެއްޓުމުން އެމީހާ އެތަނުން ނަގައި އޭޑީކޭ ހޮސްޕިޓަލަށް ގެންދިޔައީ ސިފައިންގެ އެހީތެރިކަމާ އެކު އެވެ.
އެކަމަކު މި މީހާއަށް މިހާރު ފަރުވާ ދެމުންދަނީ އައިޖީއެމްއެޗް ގައެވެ. މި މީހާއަށް ލިބުނު އަނިޔާގެ އެއްވެސް ތަފްސީލެއް އެނގިފައެއް ނުވެ އެވެ.
އަނިޔާވި މީހާއާ ހަވާލާދީ ފުލުހުން ބުނީ އެ މީހާ ވެއްޓުނީ ހޮޅިދަނޑިން އިމާރާތަށް އަރަން އުޅުމުގެ ތެރޭގައި ކަމަށެވެ. މި މީހާ އެ އިމާރާތަށް ވަންނަން އުޅުނީ ސީދާ ކޮން ބޭނުމެއްގައި ކަމެއް ފުލުހުން ނުބުނެ އެވެ.
މިމައްސަލަ އިތުރަށް ތަހުގީގު ކުރަމުންދާ ކަމަށްވެސް ފުލުހުން ބުންޏެވެ.