ހުޅުމާލޭގައި އަންނަ މަހު ހުޅުވަން ނިންމާފައިވާ ޕެޓްކެއާ ފެސިލިޓީގައި ޕެޓްތަކަށް ފަރުވާ ދޭނެ ޑޮކްޓަރުންނާއި ނަރުހުން ހޯދަން މާލޭ ސިޓީ ކައުންސިލުން އިއުލާންކޮށްފި އެވެ.
މާލޭ ސިޓީ ކައުންސިލުން އިއުލާނު ކުރީ އެއްއަހަރު ދުވަހުގެ މުއްދަތަކަށް ކޮންޓްރެކްޓް އުސޫލުން މަސައްކަތް ކުރާނެ ޖުމްލަ ހަތަރު މީހުން ހޯދުމަށެވެ. އެއީ ޑޮކްޓަރަކާއި، ވެޓެރިނަރީއަކާއި، ވެޓެރިނަރީ ދެ ނަރުހުންނެވެ.
ވެޓެރިނަރީއެއްގެ މުސާރައަކީ 35،000 ރުފިޔާ އެވެ. ވެޓެރިނަރީ ނަރުހެއްގެ މުސާރައަކީ 8،130 ރުފިޔާ އެވެ. އަދި ސާވީސް އެލަވަންސްގެ ގޮތުގައި މަސައްކަތްކުރާ ކޮންމެ ދުވަހަކަށް 100 ރުފިޔާއާއި އިތުރުގަޑީގައި މަސައްކަތް ކުރާނަމަ މުސާރައިގެ 35 ޕަސެންޓް ލިބޭނެ ކަމަށްވެސް އިއުލާނުގައިވެ އެވެ.
ވެޓެރިނަރީ ނަރުހެއްގެ މަސްއޫލިއްޔަތުތަކުގެ ތެރޭގައި ޕެޓްފެސިލީޓިއަށް ވެޓްރިނަރީގެ ހިދުމަތް ހޯދުމަށްދާ ފަރާތް ތަކަށް ހިދުމަތް ދިނުން ހިމެނެ އެވެ. އަދި ވެޓެރިނަރީ އަަންގާ ގޮތެއްގެ މަތިން ބުޅާތަކަށް ބޭސްދިނުމާއި ވެކްސިން ދިނުމާއި، ލޭނެގުމާއި، ކުޑަކަމުދަތަކެތި ޓެސްޓްކުރުމާއި، ބަލިދެނެ ގަތުމަށް ހަދަންޖެހޭ ޓެސްޓްތައް ހެދުން ހިމެނެ އެވެ. އަދި ސިއްހީ ގޮތުން ހިދުމަތް ދިނުމުގައި ބުޅާތަކަށް ބޭނުންވާ ފަރުވާ ދިނުންވެސް ހިމެނެ އެވެ.
މިމަސައްކަތަށް ޝައުގުވެރިވާ ފަރާތްތަކުން ވަޒީފާއަށް ކުރިމަތިލުމުގެ ފުރުސަތު މިމަހުގެ 29 ވަނަ ދުވަހުގެ ނިޔަލަށް ވަނީ ހުޅުވާލާފަ އެވެ. އަދި އިތުރު މައުލޫމާތު ހޯދުމަށް ސިޓީ ކައުންސިލަށް ގުޅުމަށްވެސް އިއުލާންގައިވެ އެވެ.