ދައުލަތުގެ ބަޖެޓުން ސިޔާސީ މުވައްޒަފުންގެ މުސާރައަށް ހޭދަކުރަނީ އެއް ޕަސަންޓު ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދު ބޭއްވި ޖަލްސާގައި މިއަހަރުގެ ސަޕްލިމެންޓަރީ ބަޖެޓު ހުށަހަޅުއްވަމުން މިނިސްޓާރު ވިދާޅުވީ ސިޔާސީ ފަރާތްތަކުގެ މުސާރައަށް ކުރާ ހޭދައަކީ ސަރުކާރުގެ މުޅި މުސާރައާއި އިނާޔަތްތަކަށް ކުރާ ހޭދައިގެ 4 ޕަސަންޓަށް ވުރެ ކުޑަ އަދަދެއް ކަމަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ވަނީ ސަރުކާރުގެ އިސް މުވައްޒަފުންނާއި، ކުންފުނިތަކުގެ އިސްވެެރިން އަދި މަޖިލީހުގެ މެމްބަރުންނާއި ފަނޑިޔާރުންގެ މުސާރައިން 10 ޕަސަންޓު އުނިކުރުމަށް ނިންމަވާފަ އެވެ. އަދި އެ މަނިކުފާނުގެ އަމިއްލަ މުސާރައިން ވެސް 50 ޕަސަންޓު ނުނެންގެވުމަށް ނިންމެވި އެވެ. އެހެންކަމުން ކުރިއަށް އޮތް ދެ އަހަރަށް އަމަލުކުރާނީ މި ނިންމުންތަކާ އެއްގޮތަށެވެ.
މިނިސްޓަރު ވިދާޅުވީ ރައީސް އެޅުއްވި ފިޔަވަޅުތަކަކީ ވެސް ސަރުކާރުގެ ހިންގުމުގެ ހަރަދުތައް ކުޑަކުރަން އަޅާފައިވާ ފިޔަވަޅުތަކެއް ކަމަށެވެ.
"މި ބަދަލު ގެނައީ ފިސްކަލް ދެމެހެއްޓެނިވިކަން އިއާދަކުރަން ކުރަމުންދާ މަސައްކަތުގައި ފުރިހަމައަށް ބައިވެރިވެ، ކުޑަ ނަމަވެސް އެޅެންހުރި ހުރިހާ ފިޔަވަޅުތަކެއް އެޅުމުގެ ބޭނުމުގައި،" މިނިސްޓަރު ޒަމީރު ވިދާޅުވި އެވެ.
ސަރުކާރުގެ ހިންގުމުގެ ހަރަދުތައް ކުޑަކުރުމަށް ދަތުރުފަތުރާއި ހަފްލާތައް ބޭއްވުން ފަދަ ކަންކަމަށް ކުރާ ހަރަދުތައް ހިފެހެއްޓުމަށް ގިނަ ކޮންޓްރޯލްތަކެއްގެ ތެރެއިން މަސައްކަތްކުރަމުންދާ ކަމަށާއި އޭގެ ނަތީޖާ ފެންނަމުންދާ ކަމަށް ވެސް ޒަމީރު ވިދާޅުވި އެވެ.