ރަޝިއާގެ ފަސްވަނައަށް އެންމެ ބޮޑު ސިޓީ، ކަޒާންގައި، އޮކްޓޯބަރު 22 – 24 އަށް އޮތް ބްރިކްސް ސަމިޓްގެ ހަވާސާގައި، ފަލަސްތީންގެ ރައީސް މަހްމޫދު އައްބާސް، ރަޝިއާގެ ރައީސް ލަޑިމިއާ ޕޫޓިންއާ ބައްދަލުކުރެއްވި އެވެ.
ދެ ރައީސުން ދެއްކެވި ވާހަތަކުގައި އެންމެ ޖޯޝާ އެކު ދެކެވުނީ މެދުއިރުމަތީގެ ވާހަކަތަކެވެ.
ފަލަސްތީންގެ -- އަރަބިންގެ ބިންތަކަށް ޒަޔަނިސްޓުން ވެރިވެގެން ތިބެ މުސްލިމުންނަށް ކުރާ ޖެއްސުމުގެ ވާހަކަތައް ދެ ރައީސުން ދެއްކެވި އެވެ. އަދި މިހާރު އިޒުރޭލުން ޣައްޒާ އަށާއި ހުޅަނގު އައްސޭރިއަށް ދެމުންދާ ހަމަލާތަކުގެ ވާހަކަތައް ވެސް ދެ ލީޑަރުން ވަރަށް އަަސަރާއި ޖޯޝާ އެކު ދެއްކެވި އެވެ.
ރައީސް އައްބާސް ވިދާޅުވި ގޮތުގައި ޣައްޒާ ދޫކޮށް ދިއުމަށް މަޖުބޫރުކުރި ނަމަވެސް، އެ ބިން ދޫކޮށް ފަލަސްތީން މީހުން ދުވަހަކު ވެސް ނުދާނެ އެވެ. ހުޅަނގު އައްސޭރީގައި ޔަހޫދީން ގަތުލުއާންމު ހިންގި ނަމަވެސް، އެއީ ފަލަސްތީން މީހުން ދުވަހަކު ވެސް ދޫކޮށްލާނެ ބިމެއް ނޫން ކަމަށް ވެސް އައްބާސް ވިދާޅުވި އެވެ.
އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ ކިތަންމެ ވަރަކަށް ގޮށްމުށުން ބާރުދެއްކެވި ނަމަވެސް، ކިތަންމެ ވަރަކަށް ބޮމުން ވާރޭވެއްސި ނަމަވެސް، އެއަށް ވުރެ ފަލަސްތީން މީހުންގެ އަޒުމު ގަދަ ކަމަށް އައްބާސް ވިދާޅުވި އެވެ.
އަރަބި މުސްލިމުން އަދި އިސްލާމީ އުއްމަތަކީ ސުލްހައަށް ލޯބިކުރާ ޖަމާއަތެއް ކަމަށް އައްބާސް ވިދާޅުވި އެވެ. އަރަބިންގެ އަތުގައި ފަނާކުރަނިވި ހަތިޔާރު ނެތް ސަބަބަކީ، ހަނގުރާމަކޮށް ހަމަނުޖެހުން އުފެއްދުމަކީ އެ މީހުންނަށް ޝަރުއުކުރައްވާފައި ނުވާ ކަމަށް ވާތީ ކަމަށް އައްބާސް ވިދާޅުވި އެވެ.
ފަލަސްތީނަށް މިނިވަން ދައުލަތަކަށް މުޅި ދުނިޔެ ގޮވާލައި ވަކާލާތުކުރި ނަމަވެސް، އެކަމުގައި އަމަލީ ސިފަ ޖެހޭ ތަން ފެނިވަޑައި ނުގަންނަވާ ކަމަށް ވެސް އައްބާސް ވިދާޅުވި އެވެ.
ފަލަސްތީން މީހުންނަށް މި ވަގުތު އެންމެ ރަނގަޅު ގޮތަކީ ޣައްޒާ ދޫކޮށްަފައި ދިއުންތޯ ނުވަތަ އިޒުރޭލުން އަޅާ ބޮންތަކަށް ބޯދިއްކޮށްގެން ތިބުންތޯ ސުވާލުކޮށްފި ނަމަ، މަރުވިޔަސް ހެޔޮ ކަމަށް ބުނާ މީހުން ޣައްޒާގައި މަދުނުވާނެ ކަމަށް ވެސް އައްބާސް ވިދާޅުވި އެވެ.
އައްބާސް ވިދާޅުވި ގޮތުގައި ކޮންމެ މީހަކަށް ވެސް އެންމެ ރަނގަޅު ގޮތަކަށް ވާނީ ހަނގުރާމަ ހުއްޓާލައި ސުލްހަވުމެވެ.
އިޒުރޭލުގެ ނުފޫޒާ ހެދި ސުލްހަވުމަކީ ވެސް ފަލަސްތީނަށް ކުރެވެން ނެތް ކަމެއް ކަމަށް އައްބާސް ވިދާޅުވި އެވެ.