އޭއެފްސީ އޭޝިއަން ކަޕް 17 އަހަރުން ދަށުގެ ކޮލިފިކޭޝަން މެޗެއްގައި، ޗައިނާ އަތުން ދިވެހިރާއްޖޭގެ ޒުވާން ޓީމު 9-0 ގެ ތަފާތު ބޮޑު ނަތީޖާއަކުން ބަލިވެއްޖެ އެވެ.
ޗައިނާގެ ޑާލިއާންގެ ޕުވާން ސްޓޭޑިއަމްގައި ކުޅުނު މި މެޗުގައި، އަނިޔާގެ ސަބަބުން ރާއްޖޭގެ މުހިންމު ތިން ކުޅުންތެރިން ނުކުޅެ އެވެ. އެއީ ޓީމުގެ ކެޕްޓަން މުޙައްމަދު އިލާން އިމްރާނާއި، ޔޫސުފް އަޔާން އާމިރު އަދި އެއްވަނަ ގޯލްކީޕަރު އިދާން އިސްމާޢީލް އަޝްރަފް އެވެ.
މެޗުގެ ފުރަތަމަ ހާފުގައި ޗައިނާއިން ޖެހީ ދެ ލަނޑެވެ. ނަމަވެސް ދެވަނަ ހާފުގައި އިތުރު ހަތް ލަނޑު ޖަހައި، ޗައިނާއިން މެޗު ނިންމާލީ 9-0 ގެ ނަތީޖާއަކުންނެވެ.
މި ފަހަރުގެ ކޮލިފިކޭޝަންގައި ރާއްޖެ ވަނީ ވަރަށް ވަރުގަދަ ގްރޫޕެއްގައި ޖެހިފަ އެވެ. ގްރޫޕް ސީގައި ރާއްޖެއާއެކު ހިމެނެނީ އޭޝިއާގެ ބާރުގަދަ ދެ ގައުމު ކަމަށްވާ ޗައިނާ އާއި ދެކުނު ކޮރެއާގެ އިތުރުން ބޫޓާނާއި ބަހްރެއިން އެވެ.
ކުރިން ކުޅުނު މެޗުތަކަށް ބަލާއިރު، ރާއްޖޭގެ ޒުވާން ޓީމުން ވަނީ ބޫޓާނާ އެކު 2-2 އިން އެއްވަރުކޮށް، ބަހްރެއިން އަތުން 1-0 އިން ބަލިވެފަ އެވެ. އަދި ދެކުނު ކޮރެއާ އަތުންވެސް ވަނީ 13-0 ގެ ތަފާތު ބޮޑު ނަތީޖާއަކުން ބަލިވެފަ އެވެ.
މި ވަގުތު ގްރޫޕްގެ ތާވަލުގައި އެއްވަނައިގައި އޮތީ ދެކުނު ކޮރެއާއެވެ. ދެވަނައިގައި އޮތް ޗައިނާއަށްވެސް ނުވަ ޕޮއިންޓް ލިބިފައި ވެއެވެ. ތިންވަނައިގައި އޮތް ބަހްރެއިނަށް ތިން ޕޮއިންޓް ލިބިފައިވާއިރު، ހަތަރުވަނައިގައި އޮތް ބޫޓާނާއި ފަސްވަނައިގައި އޮތް ރާއްޖެއަށް ލިބިފައިވަނީ އެންމެ ޕޮއިންޓެކެވެ.
ކޮންމެ ގްރޫޕަކުން އެއްވަނަ ހޯދާ ގައުމަކާއި، ގްރޫޕްތަކުގެ ދެވަނައިގައި އެންމެ ރަނގަޅު ނަތީޖާ ހޯދާ ފަސް ގައުމެއް އަންނަ އަހަރު ސައުދީ އަރަބިއްޔާގައި ބޭއްވުމަށް ހަމަޖެހިފައިވާ އޭއެފްސީ އޭޝިއަން ކަޕަށް ކޮލިފައިވާނެ އެވެ.