ޖަލުތަކުންކުރާ ސްކޭމް ކޯލްތައް ހުއްޓުވުމަށް ޖަލު އޮފިސަރުން ސްކޭންކުރަން ފުލް ބޮޑީ ސްކޭން މެޝިން ގެނައުމުގެ މަސައްކަތް ކުރަމުންދާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހްސާން ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން އަލީ އިހްސާން ވިދާޅުވީ މަގާމާއި ހަވާލުވިއިރު ޖަލުތަކުން ކުރާ ސްކޭމް ކޯލްތައް ވަރަށް ގިނަ ކަމަށެވެ.
އެ ގޮތުން ޖަލުގައި ތިބޭ ގައިދީންނަށް ފޯނާއި މަސްތުވާތަކެއްޗާއި ޖަލަށް ވެއްދުން މަނާތަކެތި ވައްދައިދޭ ކަމުގެ ތުހުމަތުގައި ސަލާމަތީ ބާރުތަކުން ކުރިއަށް ގެންދިޔަ އޮޕަރޭޝަންގައި 19 އޮފިސަރެއް ފާހަގަކުރެވުނު ކަމަށް އިހްސާން ވިދާޅުވި އެވެ.
މީގެ އިތުރުން ސިފައިންނާއި ފުލުހުން އަދި ޖަލު އޮފިސަރުން ގުޅިގެން ކުރިއަށް ގެންދިޔަ އޮޕަރޭޝަންގައި ޖަލުން ގިނަ އަދަދެއްގެ ފޯނު އަތުލައިގަނެވުނު ކަމަށް އޭނާ ވިދާޅުވި އެވެ.
"އެފަހުން އަޅުގަނޑުމެންނަށް ފާހަގަކުރެވުނު ޖަލުން މިކަމުގައި ބައިވެރިވާ މިންވަރު ވަރަށް ބޮޑުތަނުން ކުޑަވެފަ މި އޮތީ. ނަމަވެސް 100 ޕަސެންޓް ހައްލެއް ނުވޭ،" އިހްސާން ވިދާޅުވި އެވެ.
އިހްސާން ވިދާޅުވީ ޖަލުގައި ޖިއޯ ފެންސިން ހަދައި ޖަލުގައި ފޯނު ނުކުރެވޭ ގޮތް ހެދުމުގެ މަސައްކަތް ކުރަމުންދާ ކަމަށާއި އެއީ ޖަލުން ފޯނުން ކުރުން ހުއްޓުވޭނެ ދާއިމީ ހައްލެއް ކަމަށެވެ.
މަގާމާ ހަވާލުވެ ވަޑައިގެންނެވިއިރު ޖަލު އޮފިސަރުން ޖަލަށް ވަންނަނީ ސްކޭން ނުކުރެވި ކަމަށާއި ސްކޭން ކުރާނެ މެޝިންވެސް ނެތް ކަމަށް އިހްސާން ވިދާޅުވި އެވެ.
އިހްސާން ވިދާޅުވީ ވަގުތީ ގޮތުން މެޓަލް ޑިޓެކްޓާ ހަރުކޮށްފައިވާ ކަމަށާއި ފުލް ބޮޑީ ސްކޭން ކުރެވޭނެ މެޝިން ގެނައުމުގެ މަސައްކަތް ކުރަމުންދާ ކަމަށެވެ.