އާސަންދަ ސްކީމުގެ ދަށުން އެންމެ ގިނައިން ދޫކުރެވޭ 250 ބޭހުގެ އަގަށް ގެންނަ ބަދަލާއެކު އަހަރަކު 220 މިލިއަން ރުފިޔާ ސަލާމަތް ކުރެވޭނެ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ -- އެންސްޕާ އިން ހާމަކޮށްފި އެވެ.
އެންސްޕާ އިން ހާމަކުރި ގޮތުގައި އެކި ފިޔަވަހިތަކަށް ބަހާލައިގެން ކުރިއަށް ގެންދެވޭ މި ފިޔަވަޅުގެ ތެރެއިން އަގު މުރާޖައާ ކުރެވިފައިވާ 87 ބޭހެއްގެ އަގަށް އަންނަ ނޮވެމްބަރު މަހުގެ ފުރަތަމަ ދުވަހުން ފެށިގެން ބަދަލު އަންނާނެ އެވެ. އަދި 126 ބޭހެއްގެ އަގަށް ނޮވެމްބަރު 24 އިން ފެށިގެން ބަދަލު އަންނާނެ އެވެ.
މި ފިޔަވަޅުތަކުގެ ސަބަބުން ކުރިން އަގު ބޮޑުކޮށް ވިއްކަމުން ދިޔަ ބޭސްތަކުގެ އަގު ހެޔޮކުރެވި އާސަންދަ ސްކީމުގެ ހަރަދު ކުޑަކުރެވިގެންދާނެ ކަމަށް އެންސްޕާ އިން ބުނެ އެވެ.
"މި ބަދަލާއި ގުޅިގެން އާސަންދަ ސްކީމް މެދުވެރިކޮށް ރައްޔިތުންނަށް ހިލޭ ބޭސް ލިބިދިނުމުގެ އިންތިޒާމަށް އެއްވެސް ބަދަލެއް ނައިސް، މިބޭސް ލިސްޓުގައި ހިމެނޭ ބޭސްތަކުގެ ކޮންމެވެސް އެއް ބްރޭންޑެއް އެސްޓީއޯގެ ފާމަސީތައް މެދުވެރިކޮށް އިތުރު އަގަކާއި ނުލާ ލިބެން ހުންނާނެ،" އެންސްޕާ އިން ބުންޏެވެ.
މީގެ އިތުރުން އާސަންދަ ސްކީމުގައި ރަޖިސްޓަރީކޮށްފައިވާ އަމިއްލަ ފާމަސީތަކުގެ ތެރެއިން މި ބޭސްތައް ވިއްކުމަށް ރަޖިސްޓާކޮށްފައިވާ ފާމަސީތައް މެދުވެރިކޮށްވެސް އިތުރު އަގަކާއި ނުލާ ބޭސް ލިބޭނެ އިންތިޒާމު ހަމަޖެހިފައިވާ ކަމަށް އެންސްޕާ އިން ބުނެ އެވެ.