ބްރިކްސް ޖަމާއަތުގައި ފަލަސްތީން ބައިވެރިވެއްޖެ ނަމަ ބައިނަލްއަގްވާމީ އެހީތެރިކަން އިތުރުވާނެ ކަމަށް ފަލަސްތީންގެ ރައީސް މަހްމޫދު އައްބާސްގެ ވަރަށް އަރިސް ބޭފުޅެއް ކަމަށްވާ މަހްމޫދު އަލްހައްބާޝް ވިދާޅުވެއްޖެ އެވެ.
ފަލަސްތީން ބްރިކްސްގައި ބައިވެރިވުމާ ބެހޭ ގޮތުން ރައީސް މަހްމޫދު އައްބާސް ވެސް ވަނީ ރަޝިއާގެ ރައީސް ލަޑިމިއާ ޕޫޓިންއާ މަޝްވަރާކުރައްވާފަ އެވެ.
އައްބާސް ވިދާޅުވީ ބްރިކްސް އަކީ ފަލަސްތީނަށް މުހިންމު ޖަމާއަތެއް ކަމަށް ގަބޫލުކުރައްވާ ކަމަށެވެ. އަދި ބްރިކްސްގެ މެމްބަރަކަށް ނުވަތަ ބައިވެރިއަކަށް ނުވަތަ އޮބްޒާވަރަކަށް ވާން ފަލަސްތީން ތައްޔާރު ކަމަށެވެ.
ރަޝިއާގެ ފަސްވަނައަށް އެންމެ ބޮޑު ސިޓީ، ކަޒާންގައި، އޮކްޓޯބަރު 22 – 24 އަށް އޮތް ބްރިކްސްގެ އަހަރީ ސަމިޓްގައި، ފަލަސްތީނަށް ވަރަށް ބޮޑު ގަދަރެއް ވަނީ ދީފަ އެވެ. މި ސަމިޓްގައި ބައިވެރިންނާ މުޚާތަބުކޮށް މެމްބަރު ގައުމުތަކުން ދެއްކި ވާހަކަތަކުގައި، ފަލަސްތީންގެ ހައްގުތައް ހިމާޔަތްކުރުމަށް ބައިނަލްއަގްވާމީ މުޖުތަމައުއަށް ވަނީ ގޮވާލާފަ އެވެ.
ބްރިކްސްގެ ދާއިމީ މެމްބަރުންނާއި ބައިވެރިންގެ ވާހަކަތަކުގައި، ޒަމާން ފެށުނީއްސުރެ މެދުއިރުމަތި ސުލްހަކުރުމަށް ދެކެވޭ ވާހަކަތައް ކޮޅެއްގައި ޖެއްސޭނީ ފަލަސްތީން މިނިވަންވެގެންކަން ވަނީ ފާހަގަކޮށްފަ އެވެ.
އޮފިޝަލުން ދެކެވަޑައިގަންނަވާ ގޮތުގައި ބްރިކްސްގެ މާހައުލުގައި ފަލަސްތީނަށް އޮތް ގާތްކަން މިހާ ބޮޑުވެފައި އޮތް ވަގުތެއްގައި، މި ޖަމާއަތުގައި ފަލަސްތީން ބައިވެރިވުން ފައިދާ ބޮޑު ކަމަކަށް ވާނެ އެވެ.
ބައިނަލްއަގްވާމީ ޖަމާއަތްތަކުގައި އަދި މަޝްވަރާ ބައްދަލުވުންތަކުގައި ފަލަސްތީނަށް ވަކާލާތުކޮށްދިނުމުގައި ބްރިކްސް އޮންނާނެ ކަމަށް ވެސް އޮފިޝަލުން ވިދާޅުވި އެވެ.
މި އަހަރުގެ ބްރިކްސް ސަމިޓްގައި ބައިވެރިވި ގައުމުތަކުގެ ތެރޭގައި، ބްރެޒިލް، ރަޝިއާ، އިންޑިއާ، ޗައިނާ އަދި ސައުތު އެފްރިކާ ހިމެނެ އެވެ. މީގެ އިތުރުން އަލަށް މެމްބަރުކަން ލިބުނު މިސްރު، އިތިއޮޕިއާ، އީރާން، ޔުނައިޓެޑް އަރަބް އެމިރޭޓްސް އަދި ސައޫދީ އަރަބިއްޔާ ހިމެނެ އެވެ.
ބްރިކްސްގެ މުހިންމު ހުރިހާ ބައްދަލުވުންތަކެއްގައި -- ވަޒީރުންގެ ފެންވަރުގައި އަދި ވެރިންގެ ފެންބަރުގައި ބޭއްވޭ ހުރިހާ ބައްދަލުވުންތަކެއްގައި ސައޫދީ އަރަބިއްޔާ ބައިވެރިވި ނަމަވެސް، ސައޫދީ އަކީ ބްރިކްސްގެ ފުރިހަމަ މެމްބަރެއް ނޫނެވެ.