ރައްޔިތުންގެ މަޖިލީހަށް ހުށަހަޅާފައިވާ ސަޕްލިމެންޓްރީ ބަޖެޓް، ރައްޔިތުންގެ މަޖިލީހުން މިއަދު ފާސްކޮށްފި އެވެ.
ސަޕްލިމެންޓްރީ ބަޖެޓް ފާސްކުރަން ފެންނަ ކަމަށް 75 މެންބަރުން ވޯޓު ދެއްވިއިރު ނުފެންނަ ކަމަށް 11 މެންބަރުން ވޯޓު ދެއްވި އެވެ.
ފިނޭންސް މިނިސްޓަރު މޫސާ ޒަމީރު މިދިޔަ ބުރާސްފަތި ދުވަހު މަޖިލީހަށް ހުށަހެޅުއްވީ 5.1 ބިލިއަން ރުފިޔާގެ ސަޕްލިމެންޓްރީ ބަޖެޓެކެވެ.
ސަޕްލިމެންޓްރީ ބަޖެޓުގެ ހައިލައިޓްސް
- ޕީއެސްއައިޕީއަށް - 2 ބިލިއަން ރުފިޔާ
- ސަބްސިޑީ (ތެޔޮ، ކާޑު، ކަރަންޓާއި ނަރުދަމާ އާއި ފެނުގެ ހިދުމަތް) - 1 ބިލިއަން ރުފިޔާ
- ކޮންޓިންޖެންސީ ބަޖެޓް - 650 މިލިއަން ރުފިޔާ
- ސްޓޫޑެންޑް ލޯނު - 458 މިލިއަން ރުފިޔާ
- ސަރުކާރު ހިއްސާވާ ކުންފުނިތަކަށް ދިނުމަށް - 441 މިލިއަން ރުފިޔާ
- އެންސްޕާ - 263 މިލިއަން ރުފިޔާ
- މެޑިކަލް ކޮންޒިއުމަބަލްސް - 200 މިލިއަން ރުފިޔާ
- މުސާރަ ދިނުމަށް - 24 މިލިއަން ރުފިޔާ
ދައުލަތުގެ މި އަހަރުގެ ބަޖެޓުގެ ގޮތުގައި ފާސްކޮށްފައިވާ 49.5 ބިލިއަން ރުފިޔާގެ ބަޖެޓަށް ސަޕްލިމެންޓަރީ ބަޖެޓުގެ އަދަދު އިތުރުކުރުމުން މިއަހަރުގެ ޖުމްލަ ބަޖެޓް 55 ބިލިއަން ރުފިޔާއަށް އިތުރުވެ އެވެ.
މިއިތުރުވުމާ އެކު ބަޖެޓް ޑެފިސިޓްވާ އަދަދު 16.3 ބިލިއަން ރުފިޔާއިން 18.4 ބިލިއަން ރުފިޔާއަށް އިތުރުވާނެ އެވެ.
ސަޕްލިމެންޓްރީ ބަޖެޓާ އެކު މިއަހަރުގެ ބަޖެޓްގެ އާމްދަނީ 36.4 ބިލިއަން ރުފިޔާއަށް އަރާއިރު ރިކަރަންޓް ހަރަދު ހުންނަނީ 36.3 ބިލިއަން ރުފިޔާ ގައެވެ. ކެޕިޓަލް ހަރަދު 19 ބިލިއަން ރުފިޔާގައި ހުންނައިރު ބަޖެޓު ފައިނޭންސިން 19 ބިލިއަން ރުފިޔާއަށް އަރާނެ އެވެ.