ދިވެއްސަކަށް ވީތީ ދިވެހި ގައުމަށް ކޮށްދޭންޖެހޭ ކަންކަމުގައި ލޯމަރާލައިގެން ނުތިބުމަށް ރައީސް ޑރ. މުހައްމަދު މުއިއްޒު އެދިވަޑައިގެންފި އެވެ.
މޯލްޑިވްސް ނެޝަނަލް ޔުނިވަސިޓީ (އެމްއެންޔޫ) އިން ދަރުބާރުގޭގައި މިއަދު ހެނދުނު ކުރިއަށް ދިޔަ ދަސްވެނިވުމުގެ ރަސްމިއްޔާތުގައި ރައީސް ވިދާޅުވީ ގޮންޖެހުންތަކެއް ހުރި ނަމަވެސް އަމިއްލަ ނަފުސަށް އިތުބާރުކޮށް، ޕޮޒިޓިވް ވިސްނުމެއްގައި ތިމާއަކީވެސް ކަންކަން ކުރެވޭނެ މީހެއް ކަމަށް ގަބޫލުކޮށްގެން ގައުމީ މަސައްކަތުގައި ނަތީޖާ ނެރެންޖެހޭ ކަމަށެވެ. ގައުމު މިހާ ހިސާބަށް ގެނެސްދެއްވި އަބްތާލުންގެ ގުރުބާނީއަކީވެސް ހަނދާންނައްތާލެވޭނެ ހިދުމަތެއް ނޫން ކަމުގައިވެސް ވިދާޅުވި އެވެ.
ދިވެއްސަކަށް ވީތީ ގައުމަށް ކޮށްދޭންޖެހޭ ކަންކަމަކީ ލޯމަރާލެވެން އޮތް ކަމެއް ނޫން. އެއީ ގަބޫލުކުރަންޖެހޭ ހަގީގަތެއް،" ރައީސް ވިދާޅުވި އެވެ.
ގައުމީ ވިސްނުމުގައި ކަންކަމުގައި ކުރިއަށްދާއިރު މުހިއްމީ އަމިއްލަ ސިކުނޑިން ވިސްނައިގެން ވަމުންދާ ގޮތް ދެނެގަތުން ކަމަށާއި އެ އެގޮތަށް ކަންކަން ކުރުމުން ހަގީގަތް ސާފުވެގެންދާނެ ކަމުގައި ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ގައުމެއް ކުރިއަރާ ދާނީ މައިގަނޑު ދެ ގޮތަކުންނެވެ. އެއީ ފިކުރީ ގޮތުންނާއި ފެންނަން ހުންނަ ކަންކަމުން ހޯދައިގަންނަ ކުރިއެރުމުގެ ތެރެއިންނެވެ. އެގޮތުން މިއަދު ރާއްޖެ ހޯދަމުންދާ ކުރިއެރުންތަކަށް އިޝާރާތް ކުރައްވާ ރައީސް ވިދާޅުވީ ރައްޔިތުން ގެދޮރުވެރިކުރުވުމަށް، ބޯހިޔާވަހިކަމުގެ ދާއިރާގައި އެކަނިވެސް 2.5 ބިލިއަން ރުފިޔާގެ ބަޖެޓެއް އިއުލާންކޮށް، އެކަމުގެ މަސައްކަތްތައް ކުރިއަށްދާ ކަމުގައި ވިދާޅުވި އެވެ.
ރައީސްގެ ވާހަކަފުޅުގައި ވަނީ އަމިއްލަ ނަފުސަށް އިތުބާރުކޮށް އަމިއްލަ ސިކުނޑިން ވިސްނައިގެން ހޯދި ނަތީޖާގެ ފޮނިމީރުކަން، އަމިއްލަ ނަފުސަށާއި އާއިލާއަށާއި ގައުމަށް ހޯދައިދިނުމުގެ ވަރުގަދަ އަޒުމުގައި ކުރިއަށް ދިއުމަށްވެސް އިލްތިމާސް ކުރައްވާފަ އެވެ. އަދި މިއަދު ދަސްވެނިވި ދަރިވަރުންނަށް ލިބުނު ކާމިޔާބަކީ އެތައް ދުވަހެއްގެ މަސައްކަތާއި ގުރުބާނީކަން ފާހަގަކުރައްވައި އެއީ އެކަމަކަށް މަސައްކަތްކުރާ އަޅުންނަށް މާތް ﷲ ތަނަވަސްކޮށްދެއްވާ ރަޙުމަތެއްކަން ހަނދާންކޮށްދެއްވި އެވެ.
"މި ނަތީޖާއާއެކު އަމިއްލަ ދިރިއުޅުން އާރާސްތުކޮށް، ގައުމަށް ކޮށްދެވެން އޮތް ކަމެއްގައި ކުރިއަރާ ދިއުމުގެ އަޒުމު ވަރުގަދަ ކުރަންޖެހޭ." ރައީސް ވިދާޅުވި އެވެ.
ރައީސްގެ ވާހަަކަފުޅުގައި ވަނީ އިގްތިސާދު ފުޅާކޮށް، މަތީ ތައުލީމުގެ ބަހާ އިތުރަށް ތަނަވަސް ކުރަމަށް މިސަރުކާރުން މިހާރުވެސް ގިނަ މަސައްކަތްތަކެއް ކުރަމުންދާކަން ފާހަގަކުރައްވާފަ އެވެ. އެގޮތުން ޔުނިވަސިޓީގެ ތަމްރީނު ރިޒޯޓް ތަރައްގީ ކުރުމާއި، ފަންނުވެރި އިގްތިސާދެއް ފުޅާކުރުމާއި، ގޮންޖެހުންތަކާއި އެކުގައިވެސް ޒުވާނުންނަށް ކުރިއެރުން ކަށަވަރުކޮށްދިނުމަށް ދައުލަތުގެ ފެންވަރުގައި އަދި ބައިނަލްއަގްވާމީ ފެންވަރުގައި ކުރެވެމުންދާ މަސައްކަތްތައް ފާހަގަކުރެއްވި އެވެ.
މިރަސްމިއްޔާތުގައި ރައީސް މުއިއްޒު ވަނީ ދިވެހިރާއްޖޭގެ ތާރީހުގައި ފުރަތަމަ ފަހަރަށް ރާއްޖޭގައި ޑޮކްޓަރީ ރޮނގުން ފުރަތަމަ ޑިގްރީ ފުރިހަމަކުރި ދަރިވަރުންނަށް ސަނަދު ހަވާލުކޮށްދެއްވާފަ އެވެ. އެގޮތުން ދިވެހިރާއްޖޭގެ ގައުމީ ޔުނިވަސިޓީގެ ސްކޫލް އޮފް މެޑިސިން އިން، ފަސްޓް ޑިގްރީ އިން ޑޮކްޓާ އޮފް މެޑިސިން ފުރިހަމަ ކުރި 21 ދަސްވެނިން ވަނީ ސަނަދު ހާސިލުކޮށްފަ އެވެ. މީގެ އިތުރުން ދިވެހިރާއްޖޭގެ ގައުމީ ޔުނިވަސިޓީ އިން ކުރިއަށް ގެންދިޔަ އެކި ކޯސްތަކުން ޝަރަފުގެ އެވޯޑް ހާސިލުކުރި ދަރިވަރުންނަށްވެސް ރައީސް ވަނީ ހާއްސަ އިނާމާއި ސެޓްފިކެޓް ހަވާލުކޮށްދެއްވާފަ އެވެ.
މިރަސްމިއްޔާތުގައި ޖުމްލަ 311 ދަސްވެނިންނަށް ސަނަދު ހަވާލުކުރެވުނެވެ.