ޕްރައިވެޓް އިންޝުއަރެންސްގެ ކަވަރޭޖް ނުލިބޭ ހާލަތުގައި އާސަންދަ ސްކީމުން މިހާރުވެސް ހިދުމަތް ލިބެމުންދާ ގޮތަށް ބޭސްފަރުވާގެ ހިދުމަތް ލިބޭނެ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ހާމަކޮށްފި އެވެ.
އެންސްޕާ އިން މިކަން ހާމަކުރީ ޕްރައިވެޓް އިންޝުއަރެންސް އޮތް މީހުންނަށް މިމަހުން ފެށިގެން އާސަންދަ ލިބޭނީ ޕްރައިވެޓް އިންޝުއަރެންސް ހަމަވުމުން ކަމަށް ކަނޑައަޅާފައިވަނިކޮށް އަމިއްލަ އިންޝުއަރެންސްގެ ހިދުމަތް ދޭ ބައެއް ކުންފުނިތަކުން ކޭޝްލެސްގެ ހިދުމަތް މެދުކަނޑާލުމުންނެވެ.
ސިއްހީ ހިދުމަތްދޭ އަމިއްލަ ތަންތަނުން "އައުޓް-ޕޭޝަންޓް" ގެ ހިދުމަތްތަކަށް ބިލް ކުރުމުގައި ޕްރައިވެޓް އިންޝުއަރެންސް އަށް އިސްކަން ދިނުމާއި ގުޅޭ ގޮތުން އެންސްޕާ އިން އޮކްޓޫބަރު 31 ވަނަ ދުވަހު ކުރި އިއުލާނާ ހަވާލާދީ އެ އެޖެންސީ އިން ބުނީ އެ އިއުލާނުގައިވެސް ބަޔާންކޮށްފައިވާ ފަދައިން އެއްވެސް މީހަކަށް ޕްރައިވެޓް އިންޝުއަރެންސްގެ ކަވަރޭޖް ނުވަތަ ހިދުމަތް ނުލިބޭ ހާލަތެއްގައިނަމަ އެ މީހަކަށް އާސަންދަ ސްކީމުން މިހާރުވެސް ހިދުމަތް ލިބެމުންދާ ގޮތަށް ބޭސްފަރުވާގެ ހިދުމަތް ލިބިގެންދާނެ ކަމަށެވެ.
"އަމިއްލަ އިންޝުއަރެންސް ކުންފުނިތަކުން ކޭޝްލެސް ޕޭމަންޓް ހުއްޓާލުމުގެ ސަބަބުންކަމުގައި ވިޔަސް އަމިއްލަ އިންޝުއަރެންސް ޕޮލިސީ އިން ކަވަރޭޖް ނުލިބި، އަމިއްލަ ޖީބުން ފައިސާ ދައްކަންޖެހޭ ހުރިހާ ހާލަތެއްގައި، އާސަންދައިގެ ކަވަރޭޖް ކުރިއެކޭވެސް އެއްގޮތަށް ލިބިގެންދާނެ،" އެންސްޕާ އިން ބުނެފައިވެ އެވެ.
މިފަދަ ދަނޑިވަޅެއްގައި ކަމުގެ ހަގީގަތް އޮޅޭ ގޮތަށް އެކި ފަރާތްތަކުން ދޮގު މައުލޫމާތު ހާމަކުރަމުންދާތީ އެންސްޕާއިން ވަނީ ކަންބޮޑުވުންފާޅުކޮށްފަ އެވެ.