ވ. އާރަށް ކުއްޔަށް ދިނުމުގައި ހިންގާފައިވާ ހިޔާނާތުގެ އަމަލުތަކާ ގުޅިގެން ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން އުފުލާފައިވާ ދައުވާތައް ސާބިތުކުރުމަށް ހުށަހެޅި އާ ހެކިތައް ބަލައިނުގަތް މައްސަލަ ސުޕްރީމް ކޯޓުން ބަލަން ތައްޔާރުވެއްޖެ އެވެ.
ވ. އާރަށް ކުއްޔަށް ދިނުމުގައި ހިންގާފައިވާ ހިޔާނާތުގެ އަމަލުތަކާ ގުޅިގެން ރައީސް ޔާމީންގެ މައްޗަށް ދައުލަތުން އުފުލި ދައުވާތައް ސާބިތުކުރުމަށް ހުށަހެޅި އާ ހެކިތައް ބަލައިނުގަތުމަށް ހައިކޯޓުން ނިންމުމުން އެ މައްސަލަ ސުޕްރީމް ކޯޓަށް ހުށަހެޅީ ދައުލަތުންނެވެ.
ސުޕްރީމް ކޯޓުގެ ކަލަންޑަރުގައިވާ ގޮތުން އެ މައްސަލަ ސުޕްރީމް ކޯޓުން ފަށާނީ މި މަހުގެ 20 ވަނަ ދުވަހު އެވެ.
\
މައްސަލަ ބައްލަވާ ސުޕްރީމް ކޯޓުގެ ފަނޑިޔާރުންގެ ބެންޗުގައި ތިއްބަވަނީ ފަނޑިޔާރު އާއިޝާ ޝުޖޫން މުހައްމަދު، ފަނޑިޔާރު ޑރ. އަޒްމިރާލްދާ ޒާހިރު އަދި ފަނޑިޔާރު ޑރ. މުހައްމަދު އިބްރާހީމް އެވެ.
މި މައްސަލައިގައި ދައުލަތުން އާ ހެކިތަކެއް ހުށަހެޅީ އާރަށް ކުއްޔަށް ނެނގި ކުރީގެ މަޖިލިސް މެންބަރު ޔޫސުފް ނައީމު، ރައީސް ޔާމީނަށް ރިޝްވަތު ހުށަހެޅުމުން އެއީ ބޭރު ފައިސާ ގަނެވިއްކުމާ ގުޅޭގޮތުން ކުރެވިފައިވާ މުއާމަލާތެއް ކަމަށް ޔާމީންގެ ދިފާއީ ވަކީލުން ވިދާޅުވެފައިވާތީ އެ ދިފާއު ނަފީކުރުމަށެވެ.
ޔޫސުފް ނައީމްގެ އިސްތިއުނާފުވެސް ހަމަ އެ ދުވަހު ފަށަންވަނީ ޝެޑިއުލްކޮށްފަ އެވެ.
ދައުލަތުން ކްރިމިނަލް ކޯޓަށް ހުށަހެޅި އާ ހެކިތައް އެ ކޯޓުން ފުރަތަމަ ބަލައިގަތެވެ. ނަމަވެސް ކްރިމިނަލް ކޯޓުގެ ނިންމުން ހައިކޯޓުގައި އިސްތިއުނާފްކޮށް ޔާމީންގެ ގާނޫނީ ވަކީލުން ވަނީ ދައުލަތުން ހުށަހެޅި އާ ހެކިތައް ޝަރީއަތަށް ބަލައިނުގަނެވޭނެ ކަމަށް ބުނެ އިޖުރާއީ މައްސަލައެއް ނަގާފަ އެވެ.
ހައިކޯޓުން އަލުން ޔާމީންގެ މައްސަލަ ދަށު ކޯޓުގައި ބަލަން ހުކުމްކުރި އިރު ދައުލަތުން ހުށަހެޅި އާ ހެކިތައް ބަލައިނުގަތުމަށް އޮތީ ނިންމާފަ އެވެ. އެކަމަކު ދައުލަތުން ބުނާ ގޮތުގައި އާ ހެކިތައް ބަލައިނުގަތުމަށް ހައިކޯޓުން ނިންމުމަކީ ސުޕްރީމް ކޯޓުގެ ބައެއް ނިންމުންތަކާ ފުށު އަރާ ކަމެކެވެ.
އެމްއެމްޕީއާރްސީގެ ހިޔާނާތުގެ ތެރެއިން ވ. އާރަށް ކުއްޔަށް ދީގެން ރައީސް ޔާމީންގެ މައްޗަށް ދައުލަތުން އުފުލި ރިޝްވަތާއި މަނީ ލޯންޑްރިންގެ ކުށް ސާބިތުވެ ޔާމީން 11 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކުރީ ޑިސެމްބަރު 25، 2022 ގައެވެ. ހައިކޯޓުގައި ދަށު ކޯޓުގެ ހުކުމް އިސްތިއުނާފް ކުރުމުން ހައިކޯޓުން، ދަށު ކޯޓުގެ ހުކުމް ބާތިލްކޮށް ރައީސް ޔާމީން މިނިވަންކުރީ އޭޕްރީލް 18، 2024 ގައެވެ. އެ މައްސަލައިގެ އެއްބައި ސުޕްރީމް ކޯޓަށް ހުށަހަޅާފައިވާއިރު، މި މައްސަލަ ކްރިމިނަލް ކޯޓުގައިވެސް ވަނީ ފަށާފަ އެވެ.
ރ. ފުއްގިރި ކުއްޔަށް ދިނުމުގައި ހިޔާނާތް ހިންގި ކަމަށް ތުހުމަކޮށް ރައީސް ޔާމީންގެ މައްޗަށް ދައުލަތުން އުފުލާފައިވާ ރިޝްވަތާއި މަނީ ލޯންޑަރިންގެ އިތުރު ދައުވާއެއްވެސް ކްރިމިނަލް ކޯޓުގައި އެބައޮތެވެ. ނަމަވެސް އެ މައްސަލައިގެ އަޑުއެހުންތައް ކުރިއަށް ނުދާތާ ދުވަސްކޮޅެއްވެއްޖެ އެވެ.