ކުރިއަށް އޮތް 20 އަހަރު ދުވަހަށް އަމާޒުކޮށްގެން އެކުލަވާލުމަށް ހަމަޖެހިފައިވާ މާސްޓަ ޕްލޭނަށް މަޝްވަރާ އާއި ހިޔާލު ހޯދުމުގެ މަސައްކަތު ބައްދަލުވުން މިއަދު ފަށައިފި އެވެ.
ރާއްޖެއަކީ ތަރައްގީވެފައިވާ ގައުމެއްގެ ދަރަޖަ ހޯދުމަށް އަމާޒުކޮށްގެން ޕްލޭން ހެދުމަށް ސޯޝަލް ސެންޓަރުގައި މިއަދު ބޭއްވި ރަސްމިއްޔާތުގައި ވާހަކަދައްކަވަމުން ރައީސް ޑރ މުހައްމަދު މުއިއްޒު ވިދާޅުވީ އަމާޒަކީ 2040 ވަނަ އަހަރު އަންނަންވާއިރަށް ރާއްޖެއަށް ތަރައްގީވެފައިވާ ގައުމެއްގެ ދަރަޖަ ހޯދައިދިނުން ކަމަށެވެ.
ރައީސް ވިދާޅުވީ ރާއްޖޭގެ އުފެއްދުމުގެ ނިސްބަތް އިތުރުކޮށް ރާއްޖެއަކީ ތަރައްގީވެފައިވާ ގައުމަކަށް ހެދުމަށް ވަރަށް ބޮޑަށް ބޭނުންވާ ކަމަށެވެ. ޕްލޭން އެކުލަވާލާނީ ދުނިޔެއަށް އަންނަ ޒަމާނީ ބަދަލުތަކަށްވެސް ބަލައިގެން ކަމުގައި ވިދާޅުވި އެވެ
ރައީސް ވިދާޅުވީ ރައްޔިތުން ބޭނުންވާ ގޮތަށް ކުރިއަށް ދިއުމަށްޓަކައި އެ މިސްރާބަށް ކަންތައްތައް ބައްޓަންކުރަންޖެހޭ ކަމަށާއި ތަރައްގީގެ ޕްލޭނާ އެކު، ގައުމީ ތަރައްގީއާ ގުޅޭ ގާނޫނެއް އެކުލަވާލުމުގެ މަސައްކަތްވެސް ފަށާނެ ކަމަށެވެ.
"ބޭނުން ވަނީ ގައުމަށް އިތުރު ތަރައްގީތައް ގެނެސް، ވަޒީފާގެ ފުރުސަތުތައް އިތުރުކޮށް، ރައްޔިތުންގެ ފުދުންތެރިކަން އިތުރުކުރަން،" ރައީސް ވިދާޅުވި އެވެ.
ގައުމު ތަރައްގީކުރުމަށްޓަކައި ދުރުރާސްތާ ޕްލޭނެއް އޮތުން ވަރަށް މުހިއްމު ކަމަށާއި ސިޔާސީ އޮއިވަރުގައި ޖެހިގެން، އެ އިރެއްގައި އޮންނަ ސަރުކާރަކުން އަބަދު ބަދަލުތައް އަންނަ ގޮތަށް އެފަދަ ޕްލޭންތައް ކުރިއަށް ގެންދާނަމަ އެއީ ރައްޔިތުންނަށް އެންމެ ހެޔޮ ގޮތް ނޫން ކަމަށްވެސް ވިދާޅުވި އެވެ.
"މި ޕްލޭންގެ ބޭނުމަކީ ރައްޔިތުން ބޭނުންވާ ގޮތަށް ގައުމުގެ ތަރައްގީގެ ކަންކަން ރޭވުން،" ރައީސް ވިދާޅުވި އެވެ.