ގައުމީ ތަރައްގީގެ ޕްލޭނަށް ހުރިހާ ރަށެއްގެ ހިޔާލު ބޭނުންވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރާއްޖޭގެ 20 އަހަރުގެ ގައުމީ ތަރައްގީގެ ޕްލޭން އެކުލަވާލުމުގެ މަޝްވަރާތައް ފެށުން އިފްތިތާހު ކުރުމުގެ ރަސްމިއްޔާތުގައި ރައީސް މުއިއްޒު ވަނީ ސިޔާސީ ވިސްނުން ދޫކޮށް މިއީ ގައުމީ މަސައްކަތެއްގެ ގޮތުގައި ބަލައިގަތުމަށް އެދިވަޑައިގެންފަ އެވެ.
ރައީސް މުއިއްޒު ވަނީ ގައުމީ ތަރައްގީގެ ޕްލޭން އެކުލަވާލުމުގެ މަސައްކަތް ގާނޫނު އަސާސީގެ ތެރެއިން ބަލައިގަންނަ މަސައްކަތަކަށް ބަދަލު ކުރައްވާނެ ކަމަށް ވިދާޅުވެފަ އެވެ. އެ ގޮތުން ގައުމީ ތަރައްގީގެ ބިލެއް ރައްޔިތުންގެ މަޖިލީހަށް ހުށަހަޅުއްވާނެ ކަމަށް ވިދާޅުވި އެވެ.
"ސިޔާސީ ވިސްނުން ދޫކޮށްލާފައި މިއީ ގައުމީ މަސައްކަތެއްގެ ގޮތުގައި ބަލައިގަނެ ސިޔާސީ ޕާޓީތައް މީގައި ބައިވެރިވާންޖެހޭ،" ރައީސް ވިދާޅުވި އެވެ.
މި ޕްލޭންގެ މަސައްކަތް ރާއްޖޭގެ ހުރިހާ ރަށެއްގައި ކުރިއަށް ގެންދަވާނެ ކަމަށާއި ގައުމީ ތަރައްގީގެ ޕްލޭނަށް ކޮންމެ ރަށަކުންވެސް ބަސް ބުނުމަކީ މުހިންމު ކަމެއް ކަމަށް ރައީސް ވިދާޅުވި އެވެ.
ރައީސް މުއިއްޒު ވަނީ ގައުމީ ތަރައްގީގެ މާސްޓާ ޕްލޭން އެކުލަވާލުމުގެ މަސައްކަތް އެއް އަހަރު ދުވަހުގެ ތެރޭގައި ނިންމުމަށް މަސައްކަތް ކުރައްވާނެ ކަމަށް ވިދާޅުވެފަ އެވެ.