ރައީސުލްޖުމްހޫރިއްޔާގެ މަގާމަށް ޑރ. މުހައްމަދު މުއިއްޒު އިންތިހާބު ކުރަން މަސައްކަތް ކުރެއްވުނީތީ މިއަދު ހިތާމަކުރައްވާ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ރާއްޖޭޓީވީގެ ފަށާއިރު ޕްރޮގްރާމުގައި މިއަދު ބައިވެރިވެވަޑައިގެން ރައީސް ޔަމީން ވިދާޅުވީ ރައީސް ކަމަށް ޑރ. މުއިއްޒު ހޮވަން މަސައްކަތް ކުރެއްވުނީތީ މިއަދު އެމަނިކުފާނު ހިތާމަކުރައްވާ ކަމަށެވެ.
ރައީސް ޔަމީން ވިދާޅުވީ ރައްޔިތުން ގައުމުގެ ރައީސަކަށް މީހަކު ހޮވަނީ ވެރިކަމަށް އެ ބޭފުޅަކު ވަޑައިގެން ކޮށްދެއްވާނެ ކަމަށް ވިދާޅުވާ ވަރަށް ގިނަ ކަންތައްތަކެއް ގަބޫލުކޮށްގެން އަދި އެކަންކަން ކުރައްވާނެ ކަމުގެ ފޮނި އުއްމީދުގައި ކަމަށެވެ. އެކަމަކު ރައީސް މުއިއްޒު ވެރިކަމަށް ވަޑައިގެން ރިޔާސީ ކެމްޕޭންގައި ވެވަޑައިގެންނެވި ވައުދުތައް ފުއްދަމުން ނުދާ ކަމަށްވެސް ޔާމީން ވިދާޅުވި އެވެ.
"ވަރަށް ރެގްރެޓް ކުރަން. އަޅުގަނޑުމެންގެ މުޑުވަކުން އަޅުގަނޑުމެން ރައްޔިތުންނަށް ދެއްކި ބޭފުޅެއް [މުއިއްޒު] މިއީ އެނގޭތޯ. އެއްވެސް ގޮތަކަށް އުއްމީދެއްް ނުކުރަން މިހާ ދޭސީކޮށް މިހާ ޣައިރު ޒިންމާދާރުކޮށް މިހާ ރެކްލަސް ކަންތައްތައް ހިނގައިދާނެ ކަމަކަށް އަޅުގަނޑު އުއްމީދެއް ނުކުރަން. އެހެންވީމާ މިހާރު މިދާ ކަންތައްތައް މިހެން ގޮސްފައި ރައްޔިތުން މިހާރު ތަހައްމަލް ކުރަނީ ވަރަށް ހިތްދަތި ވަރަށް ދަތި ދުވަސްތަކެއް،" ރައީސް ޔާމީން ވިދާޅުވި އެވެ.
އެމަނިކުފާނު ވިދާޅުވީ ޕީޕީއެމް އާއި ޕީއެންސީ އަކީ މީގެކުރިން ރައްޔިތުންނަށް ދޮގު ހަދާ އޮޅުވާލައިގެން ސިޔާސީ މަސައްކަތް ކުރި ޕާޓީތަކެއް ނޫން ކަމަށެވެ. ރައީސް މުއިއްޒުގެ ސަރުކާރުގައިވެސް ގިނައީ ޕީޕީއެމް ޕީއެންސީގެ ބޭފުޅުން ކަމަށާއި އެހެންވެ މިސަރުކާރަކީ ރައްޔިތުންނަށް ދޮގު ހަދާނެ ސަރުކާރެއް ކަމަށް ކުރިން ބެލެވިފައި ނެތް ކަމަށްވެސް ވިދާޅުވި އެވެ. ނަމަވެސް ރައީސް މުއިއްޒުގެ ސަރުކާރުގައި ބައެއް ބޭފުޅުން ޒިންމާއި މަސްއޫލިއްޔަތުތަކަށް އިހްމާލުވެ ރައްޔިތުން މާޔޫސްކޮށްލުމަކީ ބަލައިގަންނާނެ ކަމަށް ނޫން ކަމަށްވެސް ވިދާޅުވި އެވެ.
ރައީސް ޔާމީން ވިދާޅުވީ ރައީސް މުއިއްޒު ވެރިކަމަށް ގެނައީ އުއްމީދުތަކަކާ އެކު ކަމަށެވެ. ނަމަވެސް ރައީސް މުއިއްޒުގެ ވެރިކަމަށް އެއް އަހަރު ވާންދާއިރު ހުރިހާ އުއްމީދެއްހެން ގެއްލި ހުރިހާ ރައްޔިތުންހެން މާޔޫސްވެއްޖެ ކަމަށްވެސް ވިދާޅުވި އެވެ.
ރައީސް ޔާމީންގެ އިންޓަވިއުގައި އެންމެ ބޮޑަށް ފާހަގަކުރެއްވީ ރާއްޖޭގައި މިއަދުވެސް އިންޑިއާ ސިފައިން ތިބި މައްސަލަ އެވެ. ރައީސް ޔާމީން ވިދާޅުވީ އިންޑިއާ ސިފައިން ރާއްޖެއިން ފޮނުވާލުމަކީ ރައީސް މުއިއްޒުގެ އެންމެ ބޮޑު އެއް ރިޔާސީ ވައުދު ކަމަށެވެ. މީގެއިތުރުން ރައީސް އިބްރާހީމް މުހައްމަދު ސޯލިހްގެ ސަރުކާރުން ރާއްޖޭގެ ކަނޑުގެ ސަރަހައްދުން ދޫކޮށްލި ބައި ހޯދުމާއި އުތުރު ތިލަފަޅުގެ އެއްބަސްވުމުގެ މައްސަލަ ރައީސް ޔާމީން ފާހަގަކުރެއްވި އެވެ.
އެމަނިކުފާނު ވިދާޅުވީ އެ ތިން މައްސަލައަށްވެސް ހައްލެއް ހޯދުމަކީ ރައީސް މުއިއްޒުގެ ވައުދަކަށްވީ ނަމަވެސް މިއަދުވެސް އެއިން އެއްވެސް ކަމަކަށް ހައްލެއް ނާންނަ ކަމަށާއި ބައެއް ކަންކަން މާބޮޑަށް ގޯސްވަމުންވެސް ދާ ކަމަށެވެ.
"އިންޑިއާ ސިފައިން ޔުނީފޯމު ބޭލުމަކުން އަދި މައްސަލަ ހައްލެއް ނުވޭ،" ރާއްޖޭގައި ތިބި އިންޑިއާ ސިފައިން ބާލާފައިވާ ކަމަށް ރައީސް މުއިއްޒު ވިދާޅުވެފައިވާތީ އެކަމަށް ރައްދުދެއްވަމުން ޔާމީން ވިދާޅުވި އެވެ.
ރައީސް ޔާމީން އިސްވެ ހުންނަވައިގެން ފެއްޓެވި "އިންޑިއާ އައުޓް" ކެމްޕޭނާ ގުޅޭގޮތުން އެމަނިކުފާނު ވިދާޅުވީ އެއީ އިންޑިއާ އާއި ޖައްސަލައިގެން ކުރާ ކަމެއް ނޫން ކަމަށެވެ. އެ ހަރަކާތުގެ މާނައަކީ އަދި ބޭނުމަކީ ރާއްޖެގައި އިންޑިއާގެ ސިފައިން ގާއިމުވެ ތިބޭ ތިބުމާ ދެކޮޅު ހެދުން ކަމަށްވެސް ވިދާޅުވި އެވެ.