ސޮވެރިން ޑިވެލޮޕްމަންޓް ފަންޑް (އެސްޑީއެފް) އަށް 87 މިލިއަން ރުފިޔާ ޖަމާކޮށްފި އެވެ.
މިއީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ދުވަހުން ފެށިގެން މިއަދާ ހަމައަށް ގާތްގަނޑަކަށް ޖަމާކުރި އަދަދެވެ. އެމަނިކުފާނު ވެރިކަމާ ހަވާލުވެވަޑައިގެންނެވިއިރު އެ ފަންޑުގައި ހުރީ ދެ މިލިއަން ޑޮލަރެވެ.
ޖުމްހޫރީ ދުވަހާ ގުޅުވައިގެން ދަރުބާރުގޭގައި މިރޭ ބޭއްވި ޖަލްސާގައި ރައީސް މުއިއްޒު ވިދާޅުވީ ސަރުކާރުގެ އަމާޒަކީ މިއަހަރު ނިމުމުގެ ކުރިން ސޮވެރިން ޑިވެލޮޕްމަންޓް ފަންޑު 100 މިލިއަން ޑޮލަރަށް ވުރެ އިތުރުކުރުން ކަމަށެވެ.
ރައީސް މިރޭ ވިދާޅުވި ގޮތުންނަމަ ސޮވެރިން ޑިވެލޮޕްމަންޓް ފަންޑަށް ފައިސާ ޖަމާކުރުމަށްފަހު މި ސަރުކާރުންވެސް އެ ފަންޑުން މަދުން ނަމަވެސް ފައިސާ ނަގާފައިވެ އެވެ.
"އެކިފަހަރު އެކި ޕޭމަންޓްސް ހެއްދުމަށް ހަމަ ރައްޔިތުންގެ ހައްގުގައި އަޅުގަނޑުމެން އެކި ޕޭމަންޓްސް ހަދައި އަނެއްކާ އެ ރިޕްލޭސް މިކުރަނީ،" ރައީސް ވިދާޅުވި އެވެ.
އެމަނިކުފާނު ވިދާޅުވީ ސަރުކާރުގެ މިހާރުގެ އަމާޒަކީ އަންނަ އަހަރުގެ ނިޔަލަށް ސޮވެރިން ޑިވެލޮޕްމަންޓް ފަންޑަށް 150 މިލިއަން ޑޮލަރަށް ވުރެ އިތުރު ކުރުން ކަމަށެވެ.
ރައީސް ޑރ. މުއިއްޒުގެ ސަރުކާރުން މީގެކުރިން ހާމަކުރި މައުލޫމާތަށް ބަލާއިރު ރައީސް އަބްދުﷲ ޔާމީންގެ ވެރިކަމުގައި އުފެއްދި ސޮވެރިން ޑިވެލޮޕްމަންޓް ފަންޑުގައި އެ ވެރިކަން ނިމުނުއިރު 500 މިލިއަން އެމެރިކާ ޑޮލަރަށް ވުރެ ގިނަ އަދަދަކަށް ފައިސާ ހުއްޓެވެ. ނަމަވެސް ރައީސް އިބްރާހީމް މުހައްމަދު ސޯލިހް ވެރިކަމާ ހަވާލުވެވަޑައިގަތުމަށްފަހު އެ ފަންޑުގައި ހުރި ހުރިހާ ފައިސާއެއް މާރުކޮށްފައިވާ ކަމަށްވެސް މިސަރުކާރުން ކުރިން ބުނެފައިވެ އެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ވަނީ ސޮވެރިން ޑިވެލޮޕްމަންޓް ފަންޑަށް ގާނޫނީ ބާރުވެރިކަން ދިނުމަށް ކަމާ ގުޅޭ ބިލެއްވެސް ރައްޔިތުންގެ މަޖިލީހަށް ހުށަހަޅާފަ އެވެ.
އެސްޑީއެފްއަކީ ކުއްލި ހާލަތުގައި ކުރިމަތި ވެދާނެ ކަމަކަށްޓަކައި އަދި ތަރައްގީގެ އެކި މަޝްރޫއުތައް ހިންގަން ނަގާ ބޮޑެތި ލޯނުތައް އަނބުރާ ދެއްކުމުގައި އިގުތިސޯދަށް އަތުވެދާނެ ލޮޅުމަކުން ލިބޭ ގެއްލުން ފޫބެއްދުމަށް 2017 ވަނަ އަހަރު އުފެއްދި ފަންޑެކެވެ.
އެ ފަންޑަށް ފައިސާ ޖަމާކުރަނީ 2017 ވަނަ އަހަރުން ފެށިގެން ނަގަމުން އަންނަ އެއާޕޯޓް ޑިވެލޮޕްމެންޓް ފީ އާއި ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ދޭ ހިދުމަތްތަކުގެ އަގަށް ބަދަލު ގެނެސްގެން އިތުރުވާ ފައިސާ އިންނެވެ.