އިންޓަނޭޝަނަލް މެޗު ބްރޭކުގައި ބަންގްލަދޭޝްއާ ދެކޮޅަށް ކުޅެން ހަމަޖެހިފައިވާ އެކުވެރިކަމުގެ ދެ މެޗަށް ދިވެހި ގައުމީ ފުޓްބޯޅަ ޓީމު މިއަދު އެ ގައުމަށް ފުރައިފި އެވެ.
މި ދަތުރަށް ނަގާފައިވާ ސްކޮޑްގައި ގިނަ އަދަދެއްގެ ޒުވާން ކުޅުންތެރިން ހިމެނެ އެވެ. މީގެ ތެރޭގައި 20 އަހަރުން ދަށުގެ ޓީމުގެ ތިން ކުޅުންތެރިންނާއި މާޒިއާގެ 14 ކުޅުންތެރިން ހިމެނެ އެވެ. މާޒިއާއަކީ ނިމުނު އޭއެފްސީ ޗެލެންޖް ކަޕްގައި ބައިވެރިވި ޓީމެވެ.
ދެ މެޗު ކުޅުމަށް ހަމަޖެހިފައިވަނީ ބަޝުންދަރާ ކިންގްސް އެރީނާގައި މި މަހުގެ 13 އަދި 16 ގައެވެ. މި މެޗުތަކަކީ ބަންގްލަދޭޝްއިން ވެސް މުހިއްމު ކަމެއް ދޭ މެޗުތަކެކެވެ.
ސްކޮޑުގައި އަލަށް ފުރުސަތު ލިބުނު ކުޅުންތެރިންގެ ތެރޭގައި ހައިސަމް ރަޝީދާއި އަހްމަދު މާއިޝް ރަޝީދު ހިމެނެ އެވެ.
މިއީ އަހަރަކަށްވުރެ ގިނަ ދުވަސްފަހުން ގައުމީ ޓީމުން ކުޅޭ ފުރަތަމަ މެޗުތަކެވެ. އެންމެ ފަހުން ބައިނަލްއަޤްވާމީ މެޗެއް ކުޅެފައިވަނީ ވެސް ބަންގްލަދޭޝްއާ ދެކޮޅަށެވެ. އެއީ މިދިޔަ އަހަރުގެ އޮކްޓޯބަރުގައި ވޯލްޑް ކަޕް ކޮލިފައިން މެޗުތަކެވެ. އޭރު މާލޭގައި ކުޅުނު މެޗު 1-1 އިން އެއްވަރުވިއިރު، ބަންގްލަދޭޝްގައި ކުޅުނު މެޗުން އެ ގައުމުން ވަނީ 2-1 އިން ކާމިޔާބުކޮށްފަ އެވެ.
އެންމެ ފަހުން ބަންގްލަދޭޝްއާ ދެކޮޅަށް ރާއްޖެ މޮޅުވެފައިވަނީ 2022 ވަނަ އަހަރު މާލޭގައި ކުޅުނު އެކުވެރިކަމުގެ މެޗެއްގައެވެ.