ނިއުކްލިއާ ހަތިޔާރަށް ވުރެ މެދު ރާސްތާ ބެލިސްޓިކް މިސައިލް ޖަރުމަނަށް މާ މުހިންމު ކަމަށް އެ ގައުމުގެ ޗާންސެލަރު، އޯލަފް ޝޯލްޒް ވިދާޅުވެއްޖެ އެވެ.
ޖަރުމަނުގެ "އާޑް" ޓީވީއަށް ދެއްވި އިންޓަވިއުއެއްގައި އޯލަފް ޝޯލްޒް ވިދާޅުވީ ނިއުކްލިއާ ބާރަކަށް ވުމަކީ ޖަރުމަނަށް ޝަރަފެއް ނޫން ކަމަށެވެ.
ނަމަވެސް، ޖަރުމަނުގެ ފަސްގަނޑުގައި އެމެރިކާއިން ބެލިސްޓިކް މިސައިލް ބެހެއްޓުމާ ދެކޮޅު ނޫން ކަމަށް އޭނާ ވިދާޅުވި އެވެ.
ޖަރުމަނުގެ ޗާންސެލަރު މިހެން ވިދާޅުވި ނަމަވެސް، ޖަރުމަނުގެ ފަސްގަނޑުގައި ހަތިޔާރު ބަހައްޓައި އަސްކަރީ މަރުކަޒު ހެދުމަށް ބޭރު ގައުމަކަށް -- އެމެރިކާއަށް ހުއްދަދިނުމަކީ ޖަރުމަނުގައި ވަރަށް ބޮޑަށް ހޫނުވެފައި އޮތް މައްސަލަ އެކެވެ.
ޗާންސެލަރުގެ މި ނިންމެވުމާ އޭނާގެ އަމިއްލަ ޕާޓީ، ސޯޝަލް ޑިމޮކްރެޓިކް ޕާޓީގެ މެމްބަރުން ވެސް ދެކޮޅެވެ. ޖަރުމަނުގައި ބޭރު ގައުމަކުން ހަތިޔާރު ގެންގުޅުމަކީ އަމިއްލަވަންތަކަން ގެއްލިގެން ހިނގައިދާނެ ކަމެއް ކަމަށް އިދިކޮޅުން ބުނެ އެވެ.
އޯލަފް ޝޯލްޒް ވިދާޅުވި ގޮތުގައި ޖަރުމަނުގައި ބެލިސްޓިކް މިސައިލް ބަހައްޓަނީ އެމެރިކާގެ ބޭނުމަކު ނޫނެވެ. މިސައިލް ބޭސްތައް ހަދަނީ ޖަރުމަނަށް ރައްކާތެރިކަން ކަށަވަރުކުރުމަށް ކަމަށްވެސް އޭނާ ވިދާޅުވި އެވެ.
ޗާންސެލަރު ވިދާޅުވި ގޮތުން ގައުމު ދިފާއުކުރުމުގެ އަސްކަރީ ގާބިލުކަން ޖަރުމަނަށް ބޭނުންވެ އެވެ. ޖަރުމަނަށް އަދި ބަޔަކު ހަމަލާތަކެއް ނުދިން ނަމަވެސް، ހަމަލާނުދޭނެ ކަމަށް ނިންމައިގެން ނުވާނެ ކަމަށްވެސް އޭނާ ވިދާޅުވި އެވެ.
ޖަރުމަނަށް ނިއުކްލިއާ ހަތިޔާރު ބޭނުންނުވުމަކީ ގައުމު ދިފާއުކުރަން ހުރަސްއެޅުމެއް ނޫން ކަމަށްވެސް ޗާންސެލަރު ވިދާޅުވި އެވެ.
ދުރު ރާސްތާ ވިސްނުމަކަށް ދާއިރު، ޗާންސެލަރު ވިދާޅުވި ގޮތުގައި ވިސްނުމަކީ ޔޫރަޕްގެ ބައެއް ގައުމުތަކާ ގުޅިގެން އަސްކަރީ ގޮތުން އަމިއްލަ ގައުމު ދިފާއުކުރެވޭ ވަރު ކުރެއްވުން ކަމަށް އޭނާ ވިދާޅުވި އެވެ.