ފަރުކޮޅުފުށީގައި ޕްރައިވެޓް ލަގްޒަރީ ވިލާތަކެއް ތަރައްގީކުރަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފި އެވެ.
ފަރުކޮޅުފުށި ގޭޓެޑް ކޮމިއުނިޓީ - ޕްރައިވެޓް ލަގްޒަރިއަސް ލިވިންގް އަކީ އެޗްޑީސީ އިން ރޭ ލޯންޗްކުރި "ޓްރާންސްފޯމިންގް ޓުމޯރޯ: ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ކީ ޕްރޮޖެކްޓްސް" ގައި ހިމެނޭ މަޝްރޫއެކެވެ.
އެޗްޑީސީ އިން ބުނި ގޮތުގައި ފަރުކޮޅުފުށި ގޭޓެޑް ކޮމިއުނިޓީއަކީ ޕްރައިވެޓް ލަގްޒަރީ ލިވިންގް ތަޖުރިބާ ކޮށްލަން ބޭނުންވާ މީހުންނަށް ޒަމާނީ ވަސީލަތްތަކާއެކު ތަރައްގީކުރާ މަޝްރޫއެކެވެ.
އެތަނުގައި 20 ބީޗް ވިލާ އާއި 60 ގާޑަން ވިލާ އާއި 26 އާބަން ވިލާ އަދި 230 ސާވިސް އެޕާޓްމަންޓް ތަރައްގީ ކުރާނެ އެވެ.
އެތަނުގެ ވަށައިގެން ޕްލާޒާ އާއި އިންޑޯ ސްޕޯޓްސް ކޮމްޕްލެކްސް އާއި ކްލަބްހައުސް އާއި ރެސްޓޯރަންޓް އަދި ލެޕް ޕޫލް ފަދަ ހިތްގައިމު ވަސީލަތްތައް ގާއިމުކުރާނެ ކަމަށް އެޗްޑީސީ އިން ބުނެ އެވެ. އަދި އިވެންޓް ސްޕޭސްވެސް ގާއިމުކުރަން ވަނީ ނިންމާފަ އެވެ.
އެޗްޑީސީ އިން ބުނި ގޮތުގައި ފަރުކޮޅުފުށީގައި ފަސް ފަންގިފިލާގެ ހޮޓަލެއް އިމާރާތްކުރާނެ އެވެ. 85 ކޮޓަރި ހިމެނޭ އެ ހޮޓަލުގައި ޕޫލް އާއި އިވެންޓް ހޯލް އަދި ވީއައިޕީ ޕާކިން ހިމެނޭނެ އެވެ.
މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވިޝަންއާ އެއްގޮތަށް ހައުސިންގެ އިތުރުން ލަގްޒަރީ ލިވިން ތަޖުރިބާ ކޮށްލުމުގެ ފުރުސަތު ފަހިކޮށްދިނުމަށް ފެށޭ މުހިންމު މަޝްރޫއެއް ކަމަށާއި މި މަޝްރޫއުގެ ސަބަބުން ވަޒީފާގެ ފުރުސަތުތައް އިތުރުވެ އިގްތިސާދު އިތުރަށް ފުޅާވެ އާންމު ތަނަވަސްކަން އިތުރުވާނެ ކަމަށް އެޗްޑީސީ އިން ބުނެ އެވެ.