މަސްތުވާތަކެތި ބޭނުންކުރާ މީހުން ފަރުވާގެ ނިޒާމަށް ވެއްދުމަށް ފުލުހުންނާއި ނެޝަނަލް ޑްރަގް އެޖެންސީ (އެންޑީއޭ)އިން ކުރިއަށް ގެންދާ ހާއްސަ އޮޕަރޭޝަންގެ ތެރެއިން މިހާތަނަށް 47 މީހުން ފަރުވާގެ ނިޒާމުގެ ތެރެއަށް ވައްދައިފި އެވެ.
ކުރިއަށް ގެންދާނެ ވަކި މުއްދަތެއް ނެތް ގޮތަށް މި އޮޕަރޭޝަން ރަސްމީކޮށް ފެށީ މިދިޔަ އޮކްޓޫބަރު 22 ވަނަ ދުވަހު އެވެ.
މި އޮޕަރޭޝަނާ ގުޅޭގޮތުން އެންޑީއޭގެ ޗެއާޕާސަން ލުބްނާ މުހައްމަދު ޒާހިރު ވިދާޅުވީ މަސްތުވާތަކެތި ބޭނުންކުރާ މީހުންގެ ތެރެއިން މަގުމަތީގައި ސަލާންޖަހަން އުޅޭ މީހުންނާއި، ވައްކަމާއި ފޭރުމުގައި ހަރަކާތްތެރިވާ މީހުންނާއި، މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މަސްތުވެގެން މިސްކިތްތަކުގައި ނިދާ މީހުންނާއި، މަސްތުވާތަކެތި ބޭނުންކުރާ މީހުން މި އޮޕަރޭޝަންގެ ތެރެއިން ފަރުވާގެ ނިޒާމަށް ގެންދެވިފައިވާ ކަމަށެވެ.
"ފަރުވާ ފޯރުކޮށްދިނުމަކީ މަސްތުވާތަކެތި ފަރުވާ ދިނުމުގައި ވަރަށް މުހިއްމު އަސާސީ ކަމެއް. އެންޑީއޭގެ ޓްރީޓްމަންޓް ހަރުދަނާކުރާއިރު ރިލެޕްސް ޕްރިވެންޝަން އަދި ރީއިންޓެގްރޭޝަން، އާފްޓަކެއާގެ އިތުރުން ޑްރަގް ޕްރިވެންޝަން މަސައްކަތްތައް ކުރުމަށް ހާއްސަ ސަމާލުކަމެއް ދީގެން ކުރެވޭ،" ލުބުނާ ވިދާޅުވި އެވެ.
ޑްރަގު އޮފެންޑާ ރިމާންޑް ސެންޓަރުގެ ފެސިލިޓީތައް ކ. ހިންމަފުއްޓާއި ހުޅުމާލޭގައި ވަނީ ސަރުކާރުން ވަނީ ގާއިމުކޮށްފަ އެވެ.
ލުބްނާ އިތުރަށް ވިދާޅުވީ ރިމާންޑް ސެންޓަރުތަކާއެކު ގިނަ ހައްލުތަކެއްވެސް މަސްތުވާތަކެތީގެ މައްސަލައަށް ލިބެމުންދާ ކަމަށެވެ. އަދި މުޖުތަމައުގައި މަސްތުވާތަކެތި ބޭނުންކޮށްގެން ކުށްކުރާ މީހުން ހުއްޓުވުމަކީ އަމާޒެއް ކަމަށާއި ރައީސް ޑރ. މުހައްމަދު މުއިއްޒުގެ މި ފަސް އަހަރު ދުވަހުގެ ތެރޭގައި މި މައްސަލައަށް ދާއިމީ ހައްލު ހޯދުމައްޓަކައި ގިނަ މަސައްކަތްތަކެއް ކުރަމުންދާ ކަމަށްވެސް ވިދާޅުވި އެވެ.