ރާއްޖެއާއި އަޒަރުބައިޖާންއާ ދެމެދު ފަތުރުވެރިކަމާއި ވައިގެ ދަތުރުފަތުރާ ގުޅޭ އެއްބަސްވުމެއްގައި ސޮއިކޮށްފި އެވެ.
ރާއްޖޭގެ ފަރާތުން އެއްބަސްވުމުގައި ސޮއި ކުރެއްވީ ފޮރިން މިނިސްޓަރު ޑރ. އަބްދުﷲ ޚަލީލް އެވެ. އަޒަރުބައިޖާންގެ ފަރާތުން ސޮއި ކުރެއްވީ އެ ގައުމުގެ ފޮރިން މިނިސްޓަރު ޖޭހުން ބައިރަމޯވް އެވެ.
ދެ ގައުމުގެ ދެމެދުގައި މި އެއްބަސްވުންތަކުގައި ސޮއި ކުރީ އަޒަރްބައިޖާންގައި ކުރިއަށް ދިޔަ ކޮޕް 29 ސަމިޓްގެ ހަވާސާގައި ދެ ގައުމުގެ ފޮރިން މިނިސްޓަރުން ބޭއްވެވި ބައްދަލުކުރެއްވުމުގެ ތެރެއިންނެވެ.
ރާއްޖޭގެ ފޮރިން މިނިސްޓްރީން އަޒަރުބައިޖާންއާ އެކު ސޮއި ކުރި އެއްބަސްވުންތަކާ ގުޅިގެން ދެ ގައުމުގެ ރައްޔިތުންނަށްވެސް ދަތުުރުފަތުރު ކުރުމުގައި ލުއިތަކެއް ލިބޭނެ ކަމަށެވެ. އަދި މިއެއްބަސްވުންތަކާ އެކު ދެ ގައުމަށްވެސް އިގްތިސާދީ ފައިދާތަކެއް ލިބޭނެ ކަަމަށްވެސް ބުންޏެވެ.
މިއެއްބަސްވުންތަކާ ގުޅިގެން އަޒަރުބައިޖާންއަށް ދަތުުރުކުރަން ބޭނުންވާ ދިވެހިންނަށް ވިސާއާ ނުލައި އެ ގައުމުގައި 90 ދުވަހު ހުރެވޭނެ އެވެ.
އަޒަރުބައިޖާންގެ ވެރިރަށް ބާކޫ އިން ރާއްޖޭގެ ވެލާނާ އިންޓަނޭޝަނަލް އެއާޕޯޓަށް މިމަހުގެ ނުވަވަނަ ދުވަހުން ފެށިގެން ދަނީ ވައިގެ ސީދާ ދަތުރުތައްވެސް ކުރަމުންނެވެ.