ރާއްޖެއާއި އަޒަރުބައިޖާންއާ ދެމެދު ކުރިއަށްދާ ހުރިހާ ޕްރޮގްރާމްތަކާއި ވެފައިވާ މުހިއްމު އެއްބަސްވުންތަކުގެ މަސައްކަތްތައް ކުރިއަށްދާ ގޮތް ބަލައި ދިރާސާކުރުމަށް ދެ ގައުމުގައި ދެމެދުގައި ފުރަތަމަ ފަހަރަށް މަޝްވަރާ ބައްދަލުވުމެއް ކުރިއަށް ގެންގޮސްފި އެވެ.
ރާއްޖޭގެ ފޮރިން މިނިސްޓްރީގައި އިއްޔެ ކުރިއަށް ދިޔަ ބައިލެޓަރަލް ކޮންސަލްޓޭޝަންސްގެ ފުރަތަމަ ބައްދަލުވުމުގައި ރާއްޖޭގެ ފަރާތުން އިސްކޮށް ހުންނެވީ ފޮރިން ސެކްރެޓަރީ ފާތިމަތު އިނާޔާ އެވެ. އަޒަރުބައިޖާންގެ ވަފްދުގައި އިސްކޮށް ހުންނެވީ އެ ގައުމުގެ ފޮރިން މިނިސްޓްރީ ޑެޕިއުޓީ މިނިސްޓަރު އެލްނޫރު މަމަދޯވް އެވެ.
މިބައްދަލުކުރެއްވުމުގައި ވަނީ ރާއްޖެއާއި އަޒަރުބައިޖާންގެ ގުޅުމުގެ ތެރެއިން ކުރިއަށްދާ ހުރިހާ ޕްރޮގްރާމްތަކާއި ވެފައިވާ މުހިއްމު އެއްބަސްވުންތަކުގެ މަސައްކަތް ކުރިއަށްދާ ގޮތް ބަލައި މުރާޖައާކޮށްފަ އެވެ.
މިބައްދަލުކުރެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިދިޔަ ނޮވެމްބަރު މަހު އަޒަރުބައިޖާނަށް ވަޑައިގެން އެ ގައުމުގެ ރައީސް އިލްހާމް އަލިޔޭވްއާ އެކު ކުރިއަށްދިޔަ މަޝްވަރާތަކާ ގުޅިގެން ކުރިއަށް ގެންދެވުނު ބައްދަލުކުރެއްވުމެކެވެ.
ރާއްޖޭގެ ފޮރިން މިނިސްޓްރީން ބުނީ މިބައްދަލުކުރެއްވުމުގައި އިންވެސްޓްމަންޓް ކުރިއެރުވުމާއި، ތައުލީމާއި، ސަގާފަތާއި، ފަތުރުވެރިކަމާއި، ކަނެކްޓިވިޓީގެ ދާއިރާއިން ގުޅުން ބަދަހިކުރުމާއި، ރައްޔިތުންގެ މެދުގައި ގުޅުން ބަދަހިކުރުމާއި، މަލްޓިލޭޓަރަލް ކޯޕަރޭޝަންގެ އިތުރުން، ދެ ގައުމުގެ މަސްލަހަތު ހިމެނޭ މުހިއްމު ކަންކަމާ ގުޅޭގޮތުން މަޝްވަރާ ކުރެވުނު ކަމަށެވެ.
ދެ ގައުމުގެ ސަރުކާރުންވެސް ވަނީ ދެ ގައުމުގެ މަސްލަހަތު ހިމެނޭ ކަންކަމުގައި އެއްބާރުލުން ދިނުމަށާއި ދެ ގައުމުގެ ދެމެދުގައި އޮތް ގާތް ރަހުމަތްތެރިކަމުގެ ގުޅުން އިތުރަށް ބަދަހިކުރާނެ ކަމުގެ ޔަގީންކަން ދީފައި ކަމަށްވެސް މިނިސްރީން ބުންޏެވެ.
އަޒަރުބައިޖާންގެ ޑެޕިއުޓީ ފޮރިން މިނިސްޓަރު މަމަދޯވް އިސްކޮށް ހުންނަވައިގެން ރާއްޖެއަށް ކުރައްވާ ދަތުރުފުޅުގައި އެ ގައުމުގެ ސަރުކާރުގެ ކަމާބެހޭ ވުޒާރާތަކުގެ އިސް ބޭފުޅުންނާއި، އަޒަރުބައިޖާންގެ އެކްސްޕޯޓް އެންޑް އިންވެސްޓްމަންޓް ޕްރޮމޯޝަން އޭޖެންސީ (އަޒްޕްރޯމޯ)ގެ އިސްވެރިންނާއި އާއި ޕްރައިވެޓް ސެކްޓާގެ މަންދޫބުންވެސް ބައިވެރިވެ އެވެ.