ދަރުމަވަންތަ ހޮސްޕިޓަލް މިރޭ ރަސްމީކޮށް ހުޅުވައިފި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހަދާފައިވާ ދަރުމަވަންތަ ހޮސްޕިޓަލް ބޭނުންކުރަން ފެށީ ނިމިގެން ދިޔަ ރައީސް އިބްރާހީމް މުހައްމަދު ސޯލިހްގެ ވެރިކަމުގައި 2019 ވަނަ އަހަރު އެވެ.
އެހެންކަމުން ދަރުމަވަންތަ ހޮސްޕިޓަލް ރައީސް ޑރ. މުހައްމަދު މުއިއްޒު މިރޭ ރަސްމީކޮށް ހުޅުއްވައިދެއްވާފައި މިވަނީ ހޮސްޕިޓަލް ބޭނުންކުރަން ފެށިތާ ފަސް އަހަރު ފަހުންނެެވެ.
ޓާޝަރީ ހޮސްޕިޓަލެއްގެ ގޮތުގައި ދަރުމަވަންތަ ހޮސްޕިޓަލް މިރޭ ރަސްމީކޮށް ހުޅުވީ ދަރިމައިވުމުގެ މައްސަލަތަކަށް ފަރުވާ ދިނުމަށް ނެޝަނަލް ފާޓިލިޓީ ސެންޓަރެއްވެސް ގާއިމުކުރުމަށްފަހު އެވެ.
ހޮސްޕިޓަލްގެ 22 ވަނަ ފްލޯގައި ހަދާފައިވާ މި ސެންޓަރުން އައިޔޫއައި އާއި ސްޕާމް، އެގް، އަދި އެމްބްރިއޯ ފްރީޒިން ފަދަ އެންމެ ޒަމާނީ ހިދުމަތްތައް ލިބޭނެ ގޮތް ވަނީ ހަމަޖައްސާފަ އެވެ.
ދަރުމަވަންތަ ހޮސްޕިޓަލް މިރޭ ހުޅުވިއިރު ހޮސްޕިޓަލްގެ 11 ވަނަ ފްލޯގައި ވަނީ އެންމެ ޒަމާނީ ފެންވަރުގެ ހައިބްރިޑް ކެތުލެބެއްވެސް ހުޅުވާފަ އެވެ.
ފަންސަވީސް ބުރިއަށް ހަދާފައިވާ ދަރުމަވަންތަ ހޮސްޕިޓަލްގެ އިމަޖެންސީ ޔުނިޓު، ކުޑަކުދިންނަށް ހާއްސަ އީއާރް އަކަށް ބަދަލުކޮށް، ކުޑަކުދިންގެ އައިސީޔޫވެސް ވަނީ އެ ހޮސްޕިޓަލްގައި ގާއިމުކޮށްފަ އެވެ.