ބ. އޭދަފުށީގައި 1،000 ހައުސިން ޔުނިޓް އިމާރާތްކުރުމަށް ޗައިނާގެ ކުންފުންޏަކާ ހަވާލުކޮށްފި އެވެ.
ރައީސް އޮފީހުގައި މިއަދު ބޭއްވި ރަސްމިއްޔާތެއްގައި މި މަޝްރޫއުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް އެވެ. ޗައިނާގެ ސައިނޯ ހައިޑްރޯ ކޯޕަރޭޝަންގެ ފަރާތުން ސޮއިކުރެއްވީ ކަންޓްރީ މެނޭޖަރު ޕެން ގުއާންޝޫ އެވެ.
މި ހައުސިން ޔުނިޓްތައް އިމާރާތްކުރުމަށް ހަމަޖެހިފައިވަނީ 15 ބުރީގެ 12 ޓަވަރުގަ އެވެ. މި ޓަވަރުގައި ހުންނާނީ ދެ ކޮޓަރީގެ 672 ފްލެޓާއި ތިން ކޮޓަރީގެ 336 ފްލެޓެވެ.
މިނިސްޓަރު މުއްތަލިބް ވިދާޅުވި ގޮތުގައި 15 ބުރީގެ 12 ޓަވަރު އެޅުމަށް ނިންމީ އޭދަފުއްޓަކީ ސަރުކާރުން ކަނޑައަޅާފައިވާ އާބަން ސެންޓަރަކަށްވެފައި އެރަށުގެ ބިން އެންމެ ހެޔޮ ގޮތުގައި ބޭނުންކުރުމަށް ކުރަންޖެހޭ މަސައްކަތުގެ ތެރެއިން ބިން އިތުރުރުކުރެވެން ނެތުމުންނެވެ.
ބޯހިޔާވަހިކަމުގެ މައްސަލަ ހައްލުކުރުމަކީ މި ސަރުކާރުގެ އެންމެ މުހިންމު އެއް ވައުދެވެ.
ބޯހިޔާވަހިކަމުގެ މައްސަލަ ހައްލުކުރުމަށް ސަރުކާރުން ވަނީ ގެދޮރު އިމާރާތްކުރަން ފަސް ޕަސެންޓްގެ ޕްރޮފިޓް މާޖިނެއްގައި ލޯނު ދޫކުރާ "ހިޔާވަހި ފައިނޭންސިން ސްކީމު" އިފްތިތާހުކޮށްފަ އެވެ.