މާލޭގައި އިމާރާތްކުރުމަށް ހަމަޖެހިފައިވާ ދާރުލް އަރުގަމް ވަގުފް އިމާރާތުގެ ކުރެހުން ތައްޔާރުކުރުމަށް ބަޔަކާ ހަވާލުކޮށްފި އެވެ.
އިސްލާމީ މަރުކަޒުގެ ޖަލްސާ ކުރާ މާލަމުގައި މިއަދު އޮތް ރަސްމިއްޔާތެއްގައި މިމަސައްކަތް ހަވާލުކުރީ އީޕޮކް އެސޯސިއޭޓްސްއާ އެވެ.
ކަމާގުޅޭ އެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއި ކުރެއްވީ މިނިސްޓަރު ޑރ. މުޙައްމަދު ޝަހީމް އަލީ ސައީދު އެވެ. އީޕޮކްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރެވެ.
މިރަސްމިއްޔާތުގައި މިނިސްޓަރު ޝަހީމް ވިދާޅުވީ އިމާރާތުގެ ކުރެހުން ވީހާވެސް އަވަހަށް ނިންމާ ކުރިއަށް އޮތް އަހަރުގެ ކުރީކޮޅު އިމާރާތުގެ އަމަލީ މަސައްކަތް ފެށުމަށް އަމާޒު ހިފާފައިވާ ކަމަށެވެ.
"މި މަސައްކަތަކީ މި ވުޒާރާއިން ކުރިއަށް ގެންދިއުމަށް ހަމަޖެހިފައިވާ އެންމެ ބޮޑު އެއް މަޝްރޫއު،" ޝަހީމް ވިދާޅުވި އެވެ.
އީޕޮކްގެ މެނޭޖިން ޑިރެކްޓަރު ވިދާޅުވީ، އެ ކުންފުންޏާ ހަވާލުކޮށްފައިވާ މަސައްކަތް މިއަދުން ފެށިގެން ކުރިއަށް ގެންދާނެ ކަމަށާއި ވީހާވެސް އަވަހަށް މަސައްކަތް އެއްކޮށް ނިންމާ ހަވާލުކުރުމަށް މަސައްކަތް ކުރާނެ ކަމަށެވެ.
އިސްލާމިކް މިނިސްޓްރީން ކުރިއަށް ގެންދިއުމަށް ހަމަޖެހިފައިވާ އެންމެ ބޮޑު ދެ މަޝްރޫއަކީ ދާރުލްއަރުގަމް މަޝްރޫއުގެ އިތުރުން ހުޅުމާލޭގައި އެޅުމަށް ތައްޔާރުވަމުންދާ ދާރުއްސަލާމް ވަގުފް އިމާރާތުގެ މަޝްރޫއެވެ.