މާލެ ސަރަހައްދުގައި އަންނަ އަހަރު 15،000 ހައުސިން ޔުނިޓް އަދި ރަށްރަށުގައި 12،940 ހައުސިން ޔުނިޓް އަޅަން ފަށާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ސަރުކާރަށް އެއް އަހަރު ފުރުމުގެ މުނާސަބަތުގައި ރޭ ސޯޝަލް ސެންޓަރުގައި ބޭއްވި ޖަލްސާގައި ރައީސް މުއިއްޒު ވިދާޅުވީ އަންނަ އަހަރުގެ ބަޖެޓަކީ ބޯހިޔާވަހިކަމުގެ ބަޖެޓެއް ކަމަށެވެ.
އެ ގޮތުން ހައުސިން އަޅަން 1.5 ބިލިއަން ރުފިޔާ އަދި ހައުސިން ލޯން ސްކީމަށް އެއް ބިލިއަން ރުފިޔާ ބަޖެޓްކޮށްފައިވާ ކަމަށް ރައީސް މުއިއްޒު ވިދާޅުވި އެވެ.
"މީގެ ތެރެއިން މާލެ ސަރަހައްދުގައި 15،000 ހައުސިން ޔުނިޓް މި އަންނަ އަހަރު އަޅަން ފަށާނެ. އަތޮޅު ތެރޭގައި 12،940 ހައުސިން ޔުނިޓް،" ރައީސް ވިދާޅުވި އެވެ.
ރައީސް ވިދާޅުވީ މުޅިން އަލަށް 41 ރަށުގައި ހައުސިން މަޝްރޫއު އަންނަ އަހަރު ކުރިއަށްދާނެ ކަމަށެވެ.
އެ ހައުސިން މަޝްރޫއުގެ މަސައްކަތް ނިންމާ މި ދައުރުގައި ހަވާލުކުރާނެ ކަމަށްވެސް ރައީސް ރޭ ވައުދުވެ ވަޑައިގެންނެވި އެވެ.