ރައީސް ޑރ. މުހައްމަދު މުއިއްޒުގެ ސަރުކާރަށް އެއް އަހަރު ފުރުނުއިރު ދެ ބިލިއަން ރުފިޔާ ހަރަދުކޮށްގެން 38 މަޝްރޫއުގެ މަސައްކަތް ނިންމައިފި އެވެ.
ކޮންސްޓަރްކްޝަން މިނިސްޓްރީން މިއަދު ބުނީ މިސަރުކާރުގެ ފުރަތަމަ އަހަރުގެ ތެރޭގައި 1.976 ބިލިއަން ރުފިޔާގެ މަޝްރޫއު ކުރިއަށް ގެންދެވުނު ނަމަވެސް ނިމިގެން ދިޔަ 19 ވަނަ ރައްޔިތުންގެ މަޖިލީހުން މިއަހަރަށް ބަޖެޓް ފާސްކޮށްފައި އޮތް ގޮތުން މަޝްރޫއުތައް ކުރިއަށް ގެންދިއުމަށް ބޮޑެތި ދަތިތައް ކުރިމަތިވި ކަމަށެވެ.
މިނިސްޓްރީން ބުނީ ނިމިދިޔަ އެމްޑީޕީގެ ސަރުކާރުން ފަށާފައި ހުއްޓާލާފައި ހުރި މަޝްރޫއުތައް ފެށުމަށް އުދަނގޫތައް ކުރިމަތިވި ނަމަވެސް ރަށްރަށުގެ ބަނދަރުމަތިންނާއި ތޮށިގަނޑުންނާއި ހިއްކި ސަރަހައްދުތަކުން މިސަރުކާރުން ކޮށްފައި ހުރި މަސައްކަތްތައް ފެންނާނެ ކަމަށެވެ.
މިސަރުކާރުގެ އެއް އަހަރުގެ ތެރޭގައި ވަނީ ނ. މާފަރު ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއާއި، އއ. މާޅޮސް، އއ. ތޮއްޑޫ، އދ. ފެންފުށި އަދި މ. މުލީގެ ބަނދަރު ހެދުމުގެ މަޝްރޫއުގެ މަސައްކަތްވެސް ނިންމާފަ އެވެ.
މީގެއިތުރުން ގޮނޑުދޮށް ހިމާޔަތްކުރުން ނުހިމަނައި، ޖުމްލަ 11 ރަށެއްގެ ބިން ހިއްކުމުގެ މަޝްރޫއާއި ގދ. ތިނަދޫ މަގު ހެދުމުގެ މަޝްރޫއުގެ މަސައްކަތްވެސް ވަނީ ނިންމާފަ އެވެ.
މިސަރުކާރަށް އެއް އަހަރުވީއިރު ފެނާއި ނަރުދަމާގެ ޖުމްލަ 29 މަޝްރޫއު ނިންމާފައިވާއިރު ކުރިއަށް ޑިސެމްބަރުގެ ނިޔަލަށް އެފަދަ އިތުރު 26 މަޝްރޫއު ނިމޭނެ ކަމަށް ކޮންސްޓްރަކްޝަން މިނިސްޓްރީން މައުލޫމާތުދެ އެވެ.
ރާއްޖޭގައި މިވަގުތު ކުރިއަށްދާ އެންމެ ބޮޑު އެއް މަޝްރޫއު ކަމަށްވާ ތިލަމާލެ ބްރިޖު މަޝްރޫއުގެ 46.6 ޕަސެންޓް ނިމިފައިވާ ކަމަށްވެސް މިނިސްޓްރީން ބުނެ އެވެ.
މިސަރުކާރަށް އެއް އަހަރުވީއިރު ނިންމާލެވުނު މަޝްރޫއުތަކެއްގެ މައުލޫމާތު ހިއްސާކޮށްފައި މިވަނީ ސަރުކާރަށް އެއް އަހަރުވީއިރު އެއްވެސް ކަމެއް ކުރެވިފައި ނުވާ ކަމަށް އިދިކޮޅު ފަރާތްތަކުން ބުނަމުން ދަނިކޮށެވެ.