އުމުރުން 13 އަހަރުގެ އަންހެން ކުއްޖަކަށް ޖިންސީ ގޯނާކުރި މައްސަލައިގައި ފިލައިގެން އުޅެނިކޮށް ހައްޔަރުކުރި މީހާ ދޫކޮށްލީ ގާނޫނާ ހިލާފަށް ކަމަށް ހައިކޯޓުން ކަނޑައަޅައިފި އެވެ.
މި މައްސަލައިގެ ތުހުމަތުގައި ހައްޔަރުކޮށްފައި ބެހެއްޓުމަށްފަހު ކޯޓުން ދޫކޮށްލީ ނ. މިލަދޫ، މީޒާން، އަހްމަދު ވިއާމް (27އ) އެވެ.
އޭނާ ދޫކޮށްލީ މިދިޔަ މަހުގެ އަށްވަނަ ދުވަހު އެވެ. އޭނާ ދޫކޮށްލުމުން ދައުލަތުން އެ މައްސަލަ ހައިކޯޓުގައި އިސްތިއުނާފު ކުރުމުން، އޭނާ ދޫކޮށްލާފައިވަނީ ގާނޫނާ ހިލާފަށް ކަމަށް ހައިކޯޓުން ވަނީ ކަނޑައަޅާފަ އެވެ.
ވިއާމް ދޫކޮށްލީ އޭނާ ބަންދުގައި ބަހައްޓައިދިނުމަށް ފުލުހުން އެދިފައިވަނިކޮށް ކަމަށް އަވަސްއަށް އެނގިފައިވެ އެވެ.
ހައިކޯޓުން ވަނީ އޭނާ ދޫކޮށްލީ ގާނޫނާ ހިލާފަށް ކަމަށް ކަނޑައަޅައި، ހަތް ދުވަހުގެ ތެރޭގައި އޭނާގެ ބަންދާ މެދު އަލުން ގޮތެއް ނިންމުމަށް އަންގާފަ އެވެ.
ހައިކޯޓުގައި މި މައްސަލަ ކުރިއަށް ގެންދަނީ އާއްމުކޮށް ހުޅުވާލައިގެން ނޫން ކަމުގައިވާތީ މައްސަލައިގެ ތަފްސީލެއް ނުލިބެ އެވެ.
އެނގިފައިވާ ގޮތުގައި ކުޑަ އަންހެން ކުއްޖަކަށް ޖިންސީ ގޯނާ ކުރުމުގެ މައްސަލައިގައި ވިއާމްއާ ދެކޮޅަށް ދައުލަތުން މިހާރު ވަނީ ދައުވާވެސް އުފުލާފަ އެވެ.
ވިއާމް ހައްޔަރުކުރިއިރު އޭނާ ފިލުމަށް އެހީތެރިވެ ދިން މީހަކުވެސް އޭރު ހައްޔަރުކުރި އެވެ. އޭނާގެ މައްޗަށްވެސް ދައުވާ އުފުލާފައިވާ ކަމަށް ވަނީ މައުލޫމާތު ލިބިފަ އެވެ.