އޭޝިއާގެ މޯސްޓް އިންސްޕަޔަރިން އެގްޒެކެޓިވްސްގެ އެވޯޑް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީއަށް ލިބިއްޖެ އެވެ.
ފަހުމީއަށް މި އެވޯޑް ލިބުނީ "އޭޝިއާސް ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް 2024" އިންނެވެ. މިއީ މެލޭޝިއާގެ މޯސް ގްރޫޕުން އިންތިޒާމްކޮށްގެން ދޭ އެވޯޑެކެވެ.
ފަހުމީއަށް މި އެވޯޑް ލިބުނީ ސްޓެލްކޯގެ މެނޭޖިން ޑިރެކްޓަރުގެ ހައިސިއްޔަތުން ކުންފުންޏާއި އެނާޖީ ސެކްޓާގެ ކުރިއެރުމަށް ކުރައްވަމުން ގެންދަވާ މަސައްކަތްތަކާ ގުޅިގެންނެވެ.
މި އެވޯޑުގެ އިތުރުން ސްޓެލްކޯ އަށް ވަނީ "އިންޑަސްޓްރީ ޗެމްޕިއަން އޮފް ދަ އިޔާ"ގެ އެވޯޑު ލިބިފަ އެވެ.
ފަހުމީ އެންމެ ފުރަތަމަ ސްޓެލްކޯއާއި ގުޅިވަޑައިގަތީ 1998 ވަނަ އަހަރު އެވެ. އެކުންފުނީގައި ފަހުމީ އެންމެ ފުރަތަމަ އަދާކުރެއްވި ވަޒީފާއަކީ އެކައުންޓް އެސިސްޓެންޓް ޓްރެއިނީއެއްގެ ވަޒީފާ އެވެ.
ފަހުމީ ވަނީ އީސްޓް ލަންޑަން ޔުނިވާސިޓީން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާސް ހާސިލްކުރައްވައިފަ އެވެ. އަދި ޔުނިވާސިޓީ އޮފް އަބާޑީންއިން އެކައުންޓިންއިން ވަނީ މާސްޓާސް ހާސިލުކުރައްވާފަ އެވެ.
މީގެއިތުރުން ފަހުމީ ވަނީ އެ ކުންފުނީގެ ޕްރޮކިއުމަންޓް ޑިޕާޓްމަންޓުގެ ހެޑްކަމާއި، ބިޒްނަސް ޑިވެލޮޕްމަންޓް ޑިޕާޓްމަންޓުގެ ހެޑްކަމުގެ އިތުރުން ކަސްޓަމާ ސާވިސްއާއި ބިލިން ޑިޕާޓްމަންޓުގެ ހެޑްކަން ވެސް ކުރައްވައިފަ އެވެ.