ކުރިއަށް އޮތް ރިޔާސީ އިންތިހާބުގައި ވާދަކުރެއްވުމަށްޓަކައި އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް އިއުލާން ކުރައްވައިފި އެވެ.
އިދިކޮޅު އެމްޑީޕީގައި މިވަގުތު ހުންނެވި އެންމެ ނުފޫޒުގަދަ އެއް ލީޑަރު -- ފައްޔާޒު މިކަން އިއުލާންކުރެއްވީ އެމްޑީޕީގެ ގައުމީ މަޖިލީހުގެ މެންބަރުން ތިއްބަވާ ވަޓްސްއަޕް ގުރޫޕްގައި ކުރެއްވި މެސެޖެއް ގައެވެ.
ނިމިދިޔަ އެމްޑީޕީގެ ސަރުކާރުގައި އިކޮނޮމިކް މިނިސްޓަރު ކަންވެސް ކުރެއްވެވި ފައްޔާޒުގެ މެސެޖުގައި އެދިވަޑައިގަތީ އޭނާގެ ކެންޑިޑެސީއަށް ތާއީދުކޮށްދެއްވުމަށެވެ.
އެމްޑީޕީގެ ރިޔާސީ ޓިކެޓްގެ ވާދަވެރިކަން ކުރިއަށް އޮތް ތަނުގައި ބޮޑުވާނެ ކަމަށް ބެލެވޭއިރު މި ޓިކެޓަށް އެމްޑީޕީގެ މިހާރުގެ ރައީސް އަބްދުﷲ ޝާހިދާއި މާލޭގެ މޭޔަރު އާދަމް އާޒިމުވެސް ވާދަކުރައްވާނެ ކަމުގެ އަޑުތައް ގަދަ އެވެ. ނަމަވެސް އެ ދެ ބޭފުޅުން ރިޔާސީ އިންތިހާބުގައި ވާދަކުރެއްވުމާ މެދު އަދި ރަސްމީކޮށް އެއްވެސް އެއްޗެއް ވިދާޅުވެފައެއް ނުވެ އެވެ.
ކުރިއަށް އޮތް ރިޔާސީ އިންތިހާބުގައި ކުރީގެ ރައީސް އިބްރާހީމް މުހައްމަދު ސޯލިހް ވާދަކުރައްވާނަންތޯ ސުވާލުކުރެއްވުމުން އެމަނިކުފާނު އެ ސުވާލަށް ސާފު ޖަވާބެއް ނުދެއްވި އެވެ. ނަމަވެސް ޕާޓީގެ އިސް ބޭފުޅުންނަށް އެމަނިކުފާނުގެ ވިސްނުން އެނގިވަޑައިގަންނަވާނެ ކަމަށް ވިދާޅުވި އެވެ.
"އަޅުގަނޑު އޮންނާނީ ދަންނަވާފައި ހުރިހާ ބޭފުޅުންނަށް ކުރިއަށް ވަޑައިގަންނަވަން،" ރައީސް ސޯލިހް މިމަހު ރާއްޖެ ޓީވީގައި ވިދާޅުވި އެވެ.
ކުރިއަށް އޮތް ރިޔާސީ އިންތިހާބުގައި ވާދަކުރައްވާނެ ކަމަށް މިހާތަނަށް ސާފުކޮށް ވިދާޅުވީ ފައްޔާޒުގެ އިތުރުން ކުރީގެ ރައީސް އަބްދުﷲ ޔާމީން އަބްދުލްގައްޔޫމެވެ.