އަންނަ އަހަރުގެ މާޗް މަހު ހެލިކޮޕްޓަރު އޮޕަރޭޓް ކުރަން ފަށާނެ ކަމަށް ޓްރާންޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
ދައުލަތުގެ މީޑިއާގައި ވާހަކަ ދައްކަވަމުން އަމީން ވިދާޅުވީ ރާއްޖޭގައި ހެލިކޮޕްޓަރުގެ ހިދުމަތް ދިނުމަށް މިދިޔަ އޮގަސްޓް މަހު ހުޅުވާލި ފުރުސަތުގައި ބައިނަލްއަގުވާމީ 36 ކުންފުންޏަކުން ޝައުގުވެރިކަން ފާޅުކޮށްފައިވާ ކަމަށެވެ.
އަމީން ވިދާޅުވީ ހެލިކޮޕިޓަރު އޮޕަރެޓް ކުރުމުގެ މަސައްކަތް ކުރާ ބަޔަކާ އެކު ކުރިއަށް އޮތް 15 ވަރަކަށް ދުވަހުގެ ތެރޭގައި ސޮއި ކުރެވިގެންދާނެ ކަމަށެވެ. އެކަމަކު ހިދުމަތް ފެށިގެންދާނީ ސިވިލް އޭވިއޭޝަންގެ ހުރިހާ މިންގަނޑުތަކާއި އެއްގޮތަށް އިންތިޒާމުތައް ހަމަޖެހުމުން ކަމަށް ވިދާޅުވި އެވެ.
"ސަލާމަތީ ގޮތުން ރާއްޖެއަށް އޮޕަރޭޓް ކުރުމަށް އެންމެ ރަނގަޅު ފެންވަރުގެ ހެލިކޮޕްޓަރުތައް ރާއްޖޭގައި އޮޕަރޭޓް ކުރާނީ،" އަމީން ވިދާޅުވި އެވެ.
މިނިސްޓަރު ވިދާޅުވީ ހެލިކޮޕްޓަރުގެ ދަތުރުތައް ފެށުމުން ބަލިމީހުން ކުއްލި ހާލަތުގައި މާލެ ގެންނަން ދިމާވާ އުދަނގޫތަކަށް ފަސޭހަވުމާއި ރޭގަނޑު ކުރަންޖެހޭ ދަތުރުކުރުމުގައި ދިމާވާ ދަތިތަކަށް ހައްލު ލިބިގެންދާނެ ކަމަށެވެ.
ހެލިކޮޕްޓަރުގެ ހިދުމަތް ދޭން ނިންމާފައިވަނީ ކުއްލި ހާލަތްތަކުގައާއި އިމަޖެންސީގައި ހިދުމަތް ދިނުމަށާއި އަދި ފަތުރުވެރިކަމުގެ ދާއިރާގައިވެސް މަސައްކަތް ކުރާ ގޮތަށް ކަމަށެވެ. އެގޮތުން 10 އަހަރު ދުވަހުގެ މުއްދަތަށް މިއެއްބަސްވުމުގެ ދަށުން މަސައްކަތް ކުރެވޭނެ ކަމަށް ޓްރާންޕޯޓް މިނިސްޓްރީން މީގެ ކުރިން ބުނެފައިވެ އެވެ.