ސަރުކާރުން ޓެކްސީގެ ހިދުމަތް ދިނުމަށް ތައްޔާރުވަމުންދާތީ އެކަމާ ދެކޮޅަށް ޓެކްސީ ޑްރައިވަރުން ހުޅުމާލޭގައި ކުރަމުން ދިޔަ މުޒާހަރާގެ ތެރެއިން ހައްޔަރުކުރި ޑްރައިވަރުންގެ މައްސަލަ ހައިކޯޓަށް ހުށަހަޅައިފި އެވެ.
މުޒާހަރާގެ ތެރެއިން ހައްޔަރުކުރި ތިން ޑްރައިވަރުންނަކީ މއ. ވިރާހު، މުހައްމަދު ޝާމިން، 39 އާއި، ލ. ދަނބިދޫ ސަންރޭ، އަހްމަދު ޝަބީން، 33 އަދި ހދ. ކުމުންދޫ ހޮލިޑޭވިލެޖް، ނުއުމާން އަހްމަދު، 36 އެވެ.
މި މީހުންގެ ބަންދާ މެދު ގޮތެއް ނިންމުމަށް މިއަދު ކޯޓަށް ހާޒިރުކުރުމުން ޝާމިން އާއި ޝަބީންގެ ބަންދަށް ކޯޓުން ފަސް ދުވަސް ޖަހާފައިވާއިރު ނުއުމާން ވަނީ ޝަރުތުތަކަކާ އެކު ދޫކޮށްލާފަ އެވެ.
ފުލުހުން ބުނީ މި ތިން މީހުން ހައްޔަރުކުރީ އާންމު ދަތުރުފަތުރަށް ހުރަސްއަޅައި ހުޅުމާލޭގެ މަގުތައް ބްލޮކް ކުރުމުން ކަމަށެވެ. މުޒާހަރާގެ ތެރެއިން ފުލުހުން ވަނީ 22 އުޅަނދުވެސް ޓޯ ކޮށްފަ އެވެ.
ޝަބީން އާއި ޝާމިންގެ ގާނޫނީ ވަކީލުންގެ ހައިސިއްޔަތުން މިއަދު ނޫސްވެރިންނަށް މައުލޫމާތު ދެއްވަމުން ވަކީލް އައިކު އަހްމަދު އީސާ ވިދާޅުވީ ޑްރައިވަރުން ގިނަ ދުވަސްތަކަކު ބަންދުގައި ބޭތިއްބުމަށް ފުލުހުން ބޭނުންވި ނަމަވެސް ފުލުހުންގެ އަތުގައި އެކަމަށް އެދެންޖެހޭ ވަރުގެ ސަބަބުތަކެއް ނެތް ކަމަށެވެ. އެހެންވެ ހައިކޯޓަށް ހުށަހެޅި މައްސަލައިގައި ޑްރައިވަރުން މިނިވަންކުރުމަށް މަސައްކަތް ކުރާނެ ކަމަށްވެސް ވިދާޅުވި އެވެ.
ޓެކްސީ ޑްރައިވަރުން އިއްޔެ ހަވީރުން ފެށިގެން ރޭ މެންދަމާ ހަމައަށް ކުރިއަށް ގެންދިޔަ މުޒާހަރާގައި ވަނީ ޓްރާންސްޕޯޓް މިނިސްޓަރު މުހައްމަދު އަމީން ވަގުތުން ވަގުތަށް އިސްތިއުފާ ދިނުމަށް ގޮވަމުންނެވެ.
ޓެކްސީ ޑްރައިވަރުން ބުނާ ގޮތުގައި ސަރުކާރުން ޓެކްސީގެ ހިދުމަތް ދޭން ފަށައިފިނަމަ އެ މީހުންގެ އާމްދަނީ އެއްކޮށް ހުއްޓި، އެތައް އާއިލާއެއް ބިކަވުމުގެ ފުރުސަތު އެބައޮތެވެ. އަދި ވެހިކަލް ރަޖިސްޓަރީ ކޮށްދިނުމާއި ޕާކިން މައްސަލައިގައި ސަރުކާރުން ގެންގުޅޭ ސިޔާސަތުގެ ސަބަބުން ވަރަށް ބޮޑަށް ދަތިވަމުންދާ ކަމަށްވެސް ޓެކްސީ ޑްރައިވަރުން ބުންޏެވެ.