އުރީދޫ މޯލްޑިވްސް އިން ކުރިއަށްގެންދާ ގްރޯ ވިތް އުރީދޫގެ ސެޝަނެއް އައްޑު އަތޮޅު ފޭދޫގައި ބާއްވައިފި އެވެ.
އިސްރަށްވެހިންނަށް ހާއްސަކޮށްގެން ކުރިއަށް ގެންދިޔަ މި ސެޝަންގައި ގޭގައި ގަސްއިންދުމާއި ހެއްދުމަށް ކުރެވިދާނެ ކަންކަން ކިޔައިދީ އަމަލީ ސެޝަނެއްވެސް ކުރިއަށް ކުރިއަށް ގެންގޮސްފައިވެ އެވެ. މި ސެޝަން ކުރިއަށް ގެންދިޔައީ ސ. ފޭދޫ އަވަށު އޮފީހާ ގުޅިގެންނެވެ.
މި ސެޝަން ނަގައިދިނީ އުރީދޫގެ "ގްރޯ ވިތް އުރީދޫ" ބްރޭންޑް އެމްބެސެޑަރު ރަމްޒީ ހުސައިން އެވެ.
މި ހަރަކާތުގައި އުމުރުން ދުވަސްވީ މުޖުތަމައުގެ ބޭނުންތަކަށް އަމާޒުކޮށްގެން އަމަލީ ސެޝަނެއް ކުރިއަށް ގެންދިޔަ އެވެ. އެގޮތުން ބައިވެރިންނާ މަޝްވަރާކޮށް ސުވާލުތަކަށް ޖަވާބު ދިނުމާޢި މިފަދަ ހަރަކާތްތަކުން ޖިސްމާނީ އަދި ނަފްސާނީ ދުޅަހެޔޮ ކަމަށް ލިބިދޭ ފައިދާތަކަށް އަލިއަޅުވާލައިފައިވެ އެވެ.
މިއީ "ގްރޯ ވިތް އުރީދޫގެ" ސިލްސިލާ ހަރަކާތްތަކުގެ ތެރެއިން މިއަހަރު ބޭއްވި ތިންވަނަ ހަރަކާތެވެ.
އުރީދޫ އިން ބުނި ގޮތުގައި އައްޑޫގައި ބޭއްވުނު މިހަރަކާތަކީ އުމުރުން ދުވަސްވީ މީހުންނަށް ހާއްސަކޮށްގެން އިންކްލޫސިވް އިވެންޓްތައް ބޭއްވުމަށް އެ ކުންފުނިން ކުރަމުންދާ މަސައްކަތުގެ ދަށުން މުޖުތަމައުގައި ހަރަކާތްތެރި މީހުންގެ ގޮތުގައި ދެމިތިބުމަށް ހިތްވަރުދިނުމުގެ ގޮތުން ކުރިއަށްގެންދިޔަ ހަރަކާތެކެވެ.
"ގްރޯ ވިތް އުރީދޫ" ސިލްސިލާގެ ދަށުން ރާއްޖޭގެ އެކި ރަށްރަށަށް ޒިޔާރަތްކޮށް ދެމެހެއްޓެނިވި އުސޫލުތައް ކުރިއަރުވައި ބައިވެރިންގެ މެދުގައި ގުޅުން ބަދަހިކުރުމުގެ ގިނަ ހަރަކާތްތަކެއް ރޭވިފައިވާ ކަމަށާއި މި ސިލްސިލާގައި އެކި އުމުރުފުރާތަކަށް ހާއްސަކޮށްގެން ޕްރޮގްރާމްތައް ކުރިއަށް ގެންދެވޭނެ ކަމަށް އުރީދޫ އިން ބުންޏެވެ.
އުމުރުން ދުވަސްވީ މީހުން ހިމެނޭ ގޮތަށް ތަފާތު ގުރޫޕްތަކަށް ހިދުމަތް ދޭ ގޮތަށް ހަރަކާތްތައް ފަރުމާކޮށް، އިންކްލޫސިވް ކޮމިއުނިޓީތައް ބިނާކުރުމަށް އުރީދޫ މޯލްޑިވްސް އިން އަބަދުވެސް މަސައްކަތް ކުރެ އެވެ.
އެ ގޮތުން މައުލޫމާތު ހިއްސާކުރުމާއި އަމަލީ ހުނަރުގެ ޒަރިއްޔާއިން މި ޑިމޮގްރަފިކް ބާރުވެރިކުރުވައި، އެ މީހުންގެ ދިރިއުޅުމުގެ ފެންވަރު މަތިކޮށް ތިމާވެށީގެ ދެމެހެއްޓެނިވި ކަންކަމަށް އެހީތެރިކަން ފޯރުކޮށްދިނުމުގެ މަގު ފަހިކޮށްދިނުމަކީ ކުންފުނީގެ އަމާޒެކެވެ.