ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭނެ ގޮތްތަކެއް ކަނޑައަޅައި ގާނޫނުއަސާސީއަށް ގެނައި އިސްލާހާ ގުޅިގެން ގާނޫނުއަސާސީގެ ދިފާއުގައި ބޮޑު ޖަލްސާއެއް ބޭއްވުމަށް ނިންމައިފި އެވެ.
މި ޖަލްސާ ބޭއްވުމަށް ހަމަޖައްސާފައިވަނީ ކުރިއަށް އޮތް ޑިސެމްބަރު 10 ވަނަ ދުވަހު މާލޭގައެވެ.
އެމްޑީޕީ އިން އިންތިޒާމުކޮށްގެން "ގާނޫނުއަސާސީގެ ދިފާއުގައި ރައްޔިތުން"ގެ ނަމުގައި މި ޖަލްސާ ބާއްވާ ދުވަހަކީ ރާއްޖޭގެ މަސްވެރިންގެ ދުވަހާއި ބައިނަލްއަގްވާމީ އިންސާނީ ހައްގުތަކުގެ ދުވަހެވެ.
އެމްޑީޕީ އިން ބުނާ ގޮތުގައި މެންބަރުންގެ ގޮނޑި ގެއްލޭނެ ގޮތްތަކެއް ކަނޑައަޅައި ގާނޫނުއަސާސީއަށް ގެނައި އިސްލާހު ތަކަކީ މިނިވަންކަމާ އެކު މަސައްކަތް ކުރައްވަންޖެހޭ މެންބަރުންގެ މަސްއޫލިއްޔަތުތަކާއި ޒިންމާތަކަށް އަރައިގަތުމަށް ގެނެސްފައިވާ އިސްލާހުތަކެކެވެ.
ގާނޫނުއަސާސީއަށް މިމަހު ގެނައި އިސްލާހުތައް ބާތިލްކުރުމަށް ކުރީގެ މަޖިލިސް މެންބަރަކު ސުޕްރީމް ކޯޓަށް ހުށަހަޅާފައިވާ މައްސަލައަށްވެސް އެމްޑީޕީ އާއި ދަ ޑިމޮކްރެޓްސް ވަނީ ތަދައްހުލް ވެފަ އެވެ.